Suche Leichte Sprache Seite vorlesen Darstellung
 Suche  Leichte Sprache  Seite vorlesen  Darstellung

Šleca, Herman (1892–1948)

Schletze, Hermann

* 7. 7. 1892 Droždźij / Drehsa
† 26. 3. 1948 Budyšin / Bautzen

Wučer, wědomostnik, dr. phil., organizator serbskeho towarstwoweho žiwjenja.

1908–14 Krajnostawski wučerski seminar w Budyšinje; 1914–17 pomocny wučer w Bukecach, 1917–18 přihotowanje na wyšeho wučerja na Lipsčanskej uniwersiće, 1918–23 studij filozofije w Praze, tam promocija z dźěłom „Dr. Jan Pětr Jordan, jeho žiwjenje a skutkowanje“ (Časopis Maćicy Serbskeje 1924/25); 1924–27 sekretar Domowiny, Serbskeje narodneje ludoweje rady, Serbskeje ludoweje strony a jednaćel Serbskeho sokołskeho zwjazka, 1927–45 wučer w Großstädtelnu pola Lipska, 1946–48 wučer na Serbskim realnym gymnaziju we Varnsdorfje. 1919 bu Š. wuzwoleny za hłowneho staršeho schadźowanki, bě załožer a 1919–20 prěni starši Zwjazka serbskeho studentstwa, 1919 zastupi do Sokoła w Praze, 1920 załoži hromadźe z M. Smolerjom a Janom Skalu w Budyšinje prěnju serbsku sokołsku jednotu. Załoži a redigowaše časopis Sokołske 1925–26. Napisa serbsku ćěłozwučowansku terminologiju kaž Serbski ćěłozwučowanski system. Prěkus (Budyšin 1927) a zestaji Sokołski spěwnik (Budyšin 1926). Organizowaše Domowinske zjězdy, Sokołske zlěty, zajězdy towarstwow a dźiwadłowych skupin do Delnjeje Łužicy. 1933 bu zajaty a započa so přećiwo njemu wobskóržba dla wulkopřerady. Proces pak so njepřewjedźe. Jako wučer we Varnsdorfje napisa prěnje serbske wučbnicy. Bě wot 1919 čłon Maćicy Serbskeje.

ŽÓ./LIT.: J. Cyž, Nekrolog – Nowa doba 2, 24, 31. 3. 1948; ts., Dr. Herman Šleca (1892–1948) – Rozhlad 8 (1958), 7. str. 237-242

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984