Šybar, Wylem (1887–1974)

Schieber, Wilhelm

serbsce tež: Šybaŕ (Šybar) Wylem

* 21. 11. 1887 Wusoka / Märkischheide (Vetschau)
† 3. 12. 1974 Wětošow / Vetschau

Wučer, akwarelist, rysowar.

1902–05 seminar a 1905–08 wučerski seminar w Starej Darbni; wučer w Mosće, po tym na wučerskej preparandźe w Nowej Cali, wojak w prěnjej swětowej wójnje, wučer na srjedźnej šuli w Berlinje, tam připódla wopyt krótkich kursow ludoweje uniwersity a rjemjesłoweje šule, hdźež so wukmani w rysowanju portrejow a aktow, někotre prózdninske studijne jězby z Berlinskim molerjom krajinow Hansom Lichtom, awtodidaktiske dalekubłanje, 1943 po schorjenju na wuměnk a přesydlenje do Wusokeje. Š. bě předewšěm płódny akwarelist delnjołužiskeje krajiny. Bě wot 1948 čłon Koła serbskich tworjacych wuměłcow a wot 1953 z čłonom Zwjazka tworjacych wuměłcow Němskeje. Wjele lět nawjedowaše kružk lajskich molerjow w Borkowach.
Š. bu wuznamjenjeny 1956 z Mytom Carla Blechena, 1959 (w kolektiwje) a 1970 z Mytom Ćišinskeho, 1964 z Wuměłskim mytom Domowiny.

ŽÓ./LIT.: Krawc, Wuměłcy, str. 107-110; Schierz, Heinrich : Wilhelm Schieber : Aquarelle und Zeichnungen ; Ausstellung zum 100. Geburtstag, Cottbus 1987; Wylem Šybaŕ : … aus Liebe zur Heimat, Bautzen 2012.

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984