Dźeń bibliotekow zajim zbudźił

70 šulerjow a pjeć rjadownjow (5. do 10. lětnik) ze Serbskeju wyšeju šulow w Radworju a w Budyšinje kaž tež ze Serbskeho gymnazija su na cyłoněmskim Dnju bibliotekow, dnja 24. oktobra, Serbsku centralnu biblioteku Serbskeho instituta w Budyšinje wopytali. Nimo powšitkowneho zawjedźenja a předstajenja biblioteki, skićeštej jim Anna Měrćinowa a archiwarka dr. Annett Brězanec dohlady do pomnikow serbskeho pismowstwa a cyle praktiske pokiwy za rešeršu w knihowni, na přikład za swoje profilowe dźěło. Šulerjo z Budyskeje wyšeje šule zajimowachu so wosebje za wupućowanje Serbow w 19. lětstotku. A najmłódši wopytowarjo z 5. lětnika zeznachu drohoćinki w archiwje a wosebitosće biblioteki kaž tež serbske hry.

Wučerki a wučerjo su poskitk dźakownje přiwzali a zdźěla hižo terminy za dalše rjadownje k dalšim temam wučinili. Anna Měrćinowa, zamołwita fachowědomostna referentka w Serbskej centralnej bibliotece: „Smy w Serbskej bibliotece a kulturnym archiwje jara spokojom ze zarjadowanjom, kotrež klětu zawěsće wospjetujemy. Poskitk je so jara derje přiwzał. Wjedźenja, tematiske dźěłarnički a prezentacije našich wobstatkow wšak mjeztym běžnje poskićamy. Dźeń bibliotekow je za nas dalša přiležnosć, na přikład šule na nas skedźbnić.“

Hižo druhi raz je so serbska biblioteka na akciskim dnju wobdźěliła a lětsa wosebity serbskorěčny program za šulske rjadownje přihotowała. We wjedźenjach informowaše wo wobstatkach a wo dźěławosći Serbskeje centralneje biblioteki.