Update: Serbski kulturny register
Štwórtk, 20.11.2025, wozjewi Serbski institut druhu, aktualizowanu wersiju Koncepta za Serbski kulturny register (SKR), kotryž bě so w přednošku dnja 27.11.2025 w Serbskim muzeju předstajił.
Serbske kulturne herbstwo je bohate a mnohostronske, při tym so rozpřestrěwa po cyłej Łužicy a přez jeje mjezy. Objekty su w archiwach, małych a wulkich muzejach, domizniskich stwach a zdźěla w priwatnych zběrkach. Rozměr wobchowanja, spřistupnjenja, zapisowanja a rjadowanja je jara wšelakory, saha wot jara přikładnych padow hač k prekernym poměram. Wulke mnóstwo objektow předleži jenož analognje na swojim městnje. Transformacija do digitalneje formy, kotraž ma centralny woznam za zawěsćenje a widźomnosć w přichodźe, steji hišće na spočatku swojeho wuwića. Je to nadawk, kotryž zamóže serbski narod jeničce na dlěšu dobu a w zhromadnym prócowanju zdokonjeć. Serbski institut bě w zašłych lětach hłownu zamołwitosć za tutón projekt přewzał a ma wotpowědnu ekspertizu, dźěło dale nawjedować a wuspěšnje dowobdźěłać. Samozrozumliwe stej při tym wuske zhromadne dźěło a wothłosowanje z wulkej ličbu institucijow, kotrež daty přewostajuja.
Ze Serbskeho kulturneho registra ma wobšěrny digitalny katalog wurosć, kiž nima jenož wědu wo mnohostronskim serbskim kulturnym herbstwje centralnje, na standardizowane wašnje a online zawěsćić a spřistupnić. Zdobom twori register walidny datowy zakład za dźělne digitalizowanje objektow samych (přez tuchwilu nastawacy digitalizaciski centrum) a za kuratěrowane prezentacije wubranych digitalnych wobstatkow. Tuta transformacija serbskeho kulturneho herbstwa nic naposledk tež muzejam, domizniskim stwam a archiwam tyje, kotrež analogne originale wobchowaja a prezentuja.
SKR chce jako zwjazowaca posłužba za heterogenu krajinu zběrkow serbskeho kulturneho herbstwa skutkować. Mnohostronske a na rozdźělnych městnach schowane wobstatki su z nowym systemom prěni raz wobšěrnje widźomne, štož polěpšuje zdobom zakład za kóždužkuli přirunowacu rešeršu (abo we wjele padach ju docyła hakle zmóžni). Nimo toho nastanje ze Serbskim kulturnym registrom trěbna techniska baza za modernym narokam wotpowědowacu prezentaciju serbskeho kulturneho herbstwa w interneće.
SKR dźěła w dialogu z datowymi partnerami, kiž postajeja přez wobjim swojeho wobdźělenja bytostnje přez register zwobraznjeny spektrum serbskeho kulturneho herbstwa.
- strona wo zarjadowanju dnja 27.11.2025: „Přichod serbskeho kulturneho herbstwa“
- direktny link na „Koncept za Serbski kulturny register (SKR)“, awtorojo: Robert Lorenc, Alf-Christian Schering, kónčna redakcija: Hauke Bartels