Natwar a wutwar Serbskeho kulturneho registra
Serbski kulturny register chce serbske kulturne herbsto w cyłej swojej šěrokosći a wšelakorosći dokumentować. Jako digitalny katalog čini wědu wo objektach a praktikach kulturneho herbstwa widźomnu a ju wobchowa. Serbski kulturny register je zakład za digitalizaciju wubranych objektow w digitalizaciskim centrumje. Serbski kulturny register bazuje na zhromadnym dźěle mnohich wšelakich po cyłej Łužicy a zwonka njeje rozbrojenych zarjadnišćow, kotrež reprezentuja jako muzeje, domizniske stwy, archiwy, priwatne zběrki atd. cyłe kulturne herbstwo.
We wobłuku tutoho předewzaća přewozmje Serbski institut nadawk, wuwić koncepciju za institucije přesahowacy register serbskeho kulturneho herbstwa. Nimo toho wutwori techniske wuměnjenja za to, zo móhli po zakónčenju pilotoweje fazy (pod financowanskim wuměnjenjom) do prawidłowneho dźěła přeńć. Projekt bě spočatnje na třilětnu dobu planowany (05/2021-04/2024, podlěšeny hač do 12/2025), při čimž sćěhowaše na něhdźe lěto trajacu ryzy koncepcionelnu fazu rozšěrjena pilotowa faza.
W julija 2026 zahaji so prěnja faza postupneho systematiskeho napjelnjowanja registra. Za tutón zaměr dojednachu so Serbski muzej w Budyšinje, Serbski muzej w Choćebuzu a Serbski institut na kooperaciju za druhe połlěto 2026: Z wobstatka Serbskeho muzeja w Budyšinje ma so w prěnjej kročeli wobšěrna zběrka plakatow do kulturneho registra integrować. A zhromadnje ze Serbskim muzejom w Choćebuzu přewjedźe institutny team z tamnišej zběrku ćišćografiskich twórbow podobny proces. Tež techniska infrastruktura so dale wutwarja – spočatk lěta 2027 ma prěnja zjawna pytanska strona přistupna być.
Dźěła realizuja so we wothłosowanju z přiběracej ličbu dalšich zarjadnišćow, kotrychž daty maja so w přichodźe do zhromadneho registra kulturneho herbstwa zapřijeć.
Dźělny projekt:
- Fotografiske registrowanje a digitalizowanje zběrki Lotara Balka (projekt ze srědkow třećich)
Nowinska informacija
- Serbski kulturny register: Projekt k dołhodbnemu napjelnjowanju w juliju zahajeny (5.8.2026, informacija)
- Serbske kulturne pomniki digitalnje zapisane (15.12.2025, zdźělenka)
- zdźělenka a krótki interview z dr. Robertom Lorencom (19.1.2023)
Wuslědki
- Přichod serbskeho kulturneho herbstwa. Što je digitalny kulturny register a čehodla jón trjebamy? – zjawny přednošk: 27.11.2025, 19:00 hodź., Serbski muzej Budyšin, referenća: Hauke Bartels, Robert Lorenc, Alf-Christian Schering (zarjadowanska stronka)
- 2. aktualizowana wersija koncepta “Serbski kulturny register“ (wot 20.11.2025)
- Lorenc, Robert (2025): Ort –Grenze –Netzwerk. Zu einigen Implikationen der Digitalisierung im sorbischen musealen Feld. W: Lětopis 72 (2025), DOI: https://doi.org/10.59195/lp.2025.72-46.
- 1. wersija koncepta “Register serbskeho kulturneho herbstwa” (wot 4.1.2023)
Na projekće wobdźěleni: Robert Lorenc, Alf-Christian Schering, Johannes Jack , Sarah Janojc, dr. Heike Messemer (wot 10.08.2026)
Spěchowarjo
