Serbski kulturny register: Projekt k dołhodbnemu napjelnjowanju w juliju zahajeny

Dobre powěsće za tuchwilu nastawacy Serbski kulturny register: Po wjacelětnej konceptowej fazy, do kotrejež słušeše tež wuwiwanje techniskeje infrastruktury (t. mj. „informaciski system registra“), zahajimy wot julija 2026 systematiske napjelnjowanje registra. Za tutón zaměr dojednachu so Serbski muzej w Budyšinje, Serbski muzej w Choćebuzu a Serbski institut na kooperaciju za druhe połlěto 2026.

Z wobstatka Serbskeho muzeja w Budyšinje ma so w prěnjej kročeli wobšěrna zběrka plakatow do kulturneho registra integrować. Za to stej spočatnje přez registraciski team podpěrana rewizija a zdźěla tež wudospołnjenje dotalnych datow k spřistupnjenju trěbnej. W zhromadnym skutkowanju ze Serbskim muzejom w Choćebuzu přewjedźe institutny team z tamnišej zběrku ćišćografiskich twórbow podobny proces. We wuslědku změje wužiwar přez centralny kulturny register přistup k woběmaj dźělnymaj zběrkomaj.

Jako přihotowanje za zapřimnjenje tež mjeńšich zběrkow wotměje so rjad dźěłarničkow z čłonami dźěłoweho kruha „Łužiski kraj muzejow“. Tež techniska infrastruktura so dale wutwarja – spočatk lěta 2027 ma prěnja zjawna pytanska strona přistupna być.

Serbski kulturny register je zamołwity za centralnu a standardizowanu inwentarizaciju serbskich kulturnych objektow njewotwisnje wot jich zaměstnjenja. Zdobom twori zakład za móžnu digitalizaciju jednotliwych objektow a zběrkow, na př. přez Digitalizaciski centrum Serbskeho instituta.

Załožba za serbski lud spěchuje projekt hač do kónca lěta. Serbski institut zasadźuje přidatnje regularne dźěłowe městno, pokročowanje projekta je planowane.

• Na projektowej stronje namakaće dalše informacije (dotalne wuslědki projekta, medijowe zdźělenki, mj. dr. wo zahajenju projekta a informacije wo pilotowym projekće kaž tež koncept „Serbski kulturny register“ jako download.