Nowa edicija z jewišćowej hudźbu Juro Mětška (knižka z dwójnej CDju)
Zhromadna zdźělenka Załožby za serbski lud a Serbskeho instituta
Dźensa, dnja 19. decembra je nowa edicija z jewišćowej hudźbu Jura Mětška (1954-2022) wušła. Nastałoj stej CDjce, bohaće ilustrowana knižka, film a dalši material w poslednimaj lětomaj we wobłuku projekta Załožby. Serbski institut je předewzaće wědomostnje přewodźał. Na předań budźe edicija wot póndźele 22. decembra w Smolerjec kniharni a Serbskej kulturnej informaciji.
Jewišćowa hudźba je wažny mozaikowy kamušk w mnohostronskim wuměłskim tworjenju serbskeho komponista načasneje hudźby Jura Mětška (1954-2022). Předležaca edicija prezentuje na dwěmaj CDjomaj jeho kompozicije k dramje “Die wendische Schiffahrt” Kita Lorenca a klankohrě “Čertowy móst” Mileny Markoveje. Nimo hudźby su so z rěčnicu tež teksty nahrawali, kotrež sceniske jednanje zjimaja. Tak móže připosłuchar spěwy a hudźbne sekwency lěpje přirjadować a cyłkownu twórbu zrozumić.
Wobrazy Ulriki Mětškoweje, fachowy tekst Geralda Felbera a dalše informacije wo awtorach a sobuskutkowacych wuměłcach knižku wudospołnjeja. Wyše toho dóstanje zajimc z pomocu wotkazow přistup k biografiji Jura Mětška (wušła w Małym rjedźe Serbskeho instituta), k wobrazam a materialijam Ulriki Mětškoweje a k filmej, dokumentowacy nahrawanja hudźby nazymu 2024 w Berlinje.
Hudźbny nawod: Christoph Breidler
Solistka: Hanka Rjelcyna
Rěčnica: Rike Schuberty
Ansambl unitedberlin
Chór Serbskeho ludoweho ansambla
Fachowy tekst: dr. Georg Felber
Redakcija, zawod: dr. Theresa Jacobsowa
Koncepcionelna podpěra: Paul Viebeg
Wudawaćel: Załožba za serbski lud
Płaćizna: 25,00 €
Premjera budźe štwórtk, 26. februara 2026, 18:00 hodź. w Smolerjec kniharni w Budyšinje.
Zawodnje pisa Theresa Jacobsowa mj.dr. wo jewišćowych kruchach:
Juro Mětšk zhudźbni 1993/94 dramu »Die wendische Schiffahrt. Eine Tragikgroteske« Kita Lorenca, kotraž liči ke klučowym twórbam serbskeje literatury. Mjez fikciju a woprawdźitosću pućujo wupřestrěwa Lorenc puće a zamylenja němsko-serbskich stawiznow wot wuchadźaceho 19.lětstotka hač do kónca Druheje swětoweje wójny. Inspirěrowany bu Lorenc při tym wot žiwjenja serbskeho kanalotwarca, kotryž wo tym sonješe, z łódźu po łužiskich wodźiznach hač k swětowym morjam jězdźić. Po prapremjerje 1994 w Němsko-Serbskim ludowym dźiwadle w Budyšinje pokaza so hra hišće raz 2013, nětko adaptowana za lajsku dźiwadłowu skupinu »Kontakt« Žónskeje iniciatiwy Budyšin – tutón raz w režiji Ulriki Mětškoweje, klankodźiwadźelnicy a mandźelskeje komponista. Wona doda zdobom z ruku molowane jewišćowe wobrazy a sceny. Při tutej składnosći křižowaštej so wuměłskej perspektiwje Mětškec mandźelskeju. Zhromadne dźěło wospjetowaše so za »Čertowy móst«, čěsku bajku Mileny Markoveje, z prapředstajenjom klankohry 1996 tohorunja w Němsko-Serbskim ludowym dźiwadle. Přeće, wubranu jewišćowu hudźbu Jura Mětška w kombinaciji z dalšimi wuměłskimi dimensijemi za šěroki publikum spřistupnić, spjelni so z předležacym multimedijom.
Biografija:
Juro Mětšk (*1954 Budyšin, †2022 Ochranow) načasny serbski komponist, wot 1968 do 1971 studij kompozicije na Specialnej šuli za hudźbu w Berlinje, wot 1971 do 1976 studij kompozicije pola Günthera Kochana na Wysokej šuli za hudźbu »Hanns Eisler« w Berlinje, wot 1976 do 1980 wučer na hudźbnej šuli w Flöha, wot 1980 do 1983 mišterski studij pola Reinera Bredemeyera na Akademiji wědomosćow NDR, 1985 dorostowe spěchowanske Myto Hansa Stiebera we wobłuku Hallskich hudźbnych dnjow, wot 1983 do 1986 hudźbny dramaturg při Němsko-Serbskim ludowym dźiwadle w Budyšinje, wot 1986 swobodnje skutkowacy komponist w Budyšinje, 2017 Myto Ćišinskeho za kompozitoriske tworjenje a wědomostne přinoški wo serbskej hudźbje.