Ponuchanski dźeń na sadowcowej łuce z Lejom w bunclach – Sep nowych rěčnych kućikow na portalu hornjoserbsce.de online
Kak deklinuju prawje předmjeno Leo? Što je lěpje – ponuchanski abo čušlenski dźeń? Čehodla rěkaja buncle buncle? A kak prajimy łukam połnych sadowcow serbsce? To su štyri z cyłkownje 45 nowych rěčnych kućikow na portalu hornjoserbsce.de Serbskeho instituta.
Njedawno je Serbski institut woblubowane „rěčne kućiki“ z lěta 2025 na swojim rěčnym portalu hornjoserbsce.de wozjewił. Rěčnokulturne přinoški wudźěłaja rěčespytnicy Serbskeho instituta prěnjotnje za Serbski rozhłós. Wusyłaja so kóždu srjedu rano. W awdiotece MDR su online, chronologisce rjadowane. Nětko su 45 přinoški z lěta 2025 na rěčnym portalu hornjoserbsce.de tež do centralneho pytanja zapřijate, tak zo wužiwar přinoški spěšnje a jednorje namaka.
Z dohromady 953 kućikami prezentuje Serbski institut nahladnu zběrku rěčnokulturnych přinoškow. Přinoški za Serbski rozhłós wudźěłaja a předstajeja rěčespytnicy dr. Anja Pohončowa, dr. Leńka Šołćic a dr. Jana Šołćina kaž tež něhdyša kolegina dr. Sonja Wölkowa. Zahajił je so rozhłosowy rjad w lěće 2002. „Rěčne kućiki“ su bóle praktiske hač teoretiske rozmyslowanja wo najwšelakorišich prašenjach moderneje hornjoserbšćiny. Na institutnym portalu móže zajimc za konkretnymi přikładami abo temami rešeršować.
Portal hornjoserbsce.de natwarja so wot lěta 2017 a zmóžni jednotny přistup k informaciskim žórłam wo hornjoserbšćinje, kotrež su so w Serbskim instituće nadźěłali abo z jeho wobdźělenjom. Serwis skića zdźěla tež wobšěrne fleksiske tabulki direktnje na městnje – přijomny feature za tych, kiž rěč hakle wuknu abo sej wěsći njejsu, kak prawje skłonjować abo časować. Fleksiske tabulki su zarjadowane za Nowy němsko-hornjoserbski słownik, za wobdźěłane online-wudaće Słownika noweje leksiki a za modul Nowa leksika a maja so postupnje tez na dalše serwisy rozšěrić.