Ewaluacija rěčneje kompetency w serbskej rěči

Status projekta (02/2026)

Kónc lěta 2025 dósta Serbski institut zdźělenku wo dalšej přidźělence za dalewjedźenje projekta, najprjedy hač do 31.12.2026.

Dotal so dwaj lětnikaj přepytowaštej, konkretne wuslědki je projektowy team we wotpowědnych šulach předstajił. Po naprašowanju je nawodnica projekta dr. Jana Šołćina wuslědki w anonymizěrowanej a powšitkownje zjatej formje tež we wobłuku kubłanja angažowanym serbskim institucijam (na př. Domowinje abo Serbskemu šulskemu towarstwu) a na fachowych zeńdźenjach prezentowała. Sakskemu ministerstwu za kultus (SMK) jako nadawkidawarjej přepoda a předstaji projektowa skupina lětnje mjezyrozprawu kaž tež kónčnu rozprawu na kóncu lěta.

Hłowne dopóznaća: Wobšěrny material znazornja, zo wobdźělnicy we wšěch kompetencnych wobłukach (zrozumjace słuchanje a čitanje, rěčna refleksija, pisanje a rěčenje) diferencowany wukonowy spektrum docpěja. Doporuči so optiměrowanje L1-didaktiki a etablěrowanje L2-didaktiki.

Pozadk

Po wjacelětnej probowanskej fazy zawjedźe so šulsku družinu přesahowacy koncept „2plus“ w šulskim lěće 2013/2014 na cyłkownje 13 šulach Swobodneho stata Sakskeje. Koncept k přiswojenju rěče nawjazuje na mjeztym w předšulskim wobłuku etablěrowany Witaj-projekt a zawěsća wot zakładneje přez wyšu šulu hač k gymnazijej njepřetorhnjeny dwu- resp. wjacerěčny kubłanski poskitk. Mjeztym dźěła cyłkownje 16 šulow po tutym koncepće. Z tym njeskića jenož serbsku rěčnu wučbu, ale wyše toho dwurěčnu wěcnu a fachowu wučbu. Hižo někotre lěta je přepruwowanje efektiwity přesadźenja na šulach planowane (mjez druhim z testowanjom rěčneje zamóžnosće). Po pilotowej fazy (wot septembra 2022) přewjedźe projektowy team wot lěta 2023 lětnje přepruwowanje wukonow šulerjow wosmeho lětnika w předmjeće serbšćina. Sakske statne ministerstwo za kultus bě so w nalěću 2022 na Serbski institut z próstwu wobroćił tutu ewaluaciju wědomostnje přewodźeć. K tomu słušeja organizacija a wuhódnoćenje testow rěčneje kompetency a formulacija jednanskich doporučenjow.

Kooperaciske partnery:

• Sakske statne ministerstwo za kultus (SMK)
• Krajny zarjad za šulu a kubłanje (LaSuB), wotnožka Budyšin
• Friedricha-Schillerowa-uniwersita Jena, Katedra za metodiku a ewaluaciske slědźenje (www.kompetenztest.de)
• Rěčny centrum WITAJ Domowiny, Budyšin

Medijowe informacije k zahajenju projekta (wozjewjene dnja 5.9.2022)

Spěchowarjo

Sakske statne ministerstwo za kultus