Globalna nabožina – lokalna moderna. Misionstwo, towaršnosć, narodnosć w serbskej Łužicy

Lětstotk mjez 1750 a 1850 charakterizuja hoberske towaršnostne přełamy a krizy. Runje w tutym njeměrnym času je sylny zajim za misionske hibanje w ewangelskich Serbach zwěsćić. Mjez druhim załožichu so misionske towarstwa a misionske časopisy a wuwichu so nowe towaršnostne formaty, kaž misionske swjedźenje. Zdobom poda so wokoło 80 misionarow serbskeho pochada do globalneje słužby.
Přiběraca globalna zwjazanosć wuskutkowaše so tak tež na towaršnostne wuwiće we Łužicy a wobwliwowaše proces narodneho wuwědomjenja w Serbach. Nimo toho hodźi so misionske hibanje ze swojim jasnym fokusom za Bože kralestwo dźěłać, tež jako wotmołwa na towaršnostne njeměry a přełamy zrozumić. Globalny raz misionskeho hibanja wotewri z tym nowy wid na serbske stawizny na puću do moderny.