„Serbska Łužica“ – sony a rumy narodneje mjeńšiny wot 1918 hač do dźensnišeho

Serbski institut w Budyšinje zrealizuje slědźenske předewzaće, kotrež so přez Statne ministerstwo za wědomosć a wuměłstwo w ramiku programa duchownych wědomosćow 2018-2020 pod ćežišćom „1918 – Chiffre für Umbruch und Aufbruch“ wot aprila 2018 hač do decembra 2020 spěchuje. W srjedźišću interdisciplinarneho předewzaća steja předstawy serbskeje Łužicy, kotrež zdobychu sej w zwisku z noworjadowanjom Europy po 1918 relewancu a kotrež so w běhu 20. lětstotka wot wšelakorych akterow z rozdźělnymi motiwami a z rozdźělnym wuspěchom dale wuwiwachu. Předewzaće zaběra so z funkciju kaž tež z wuskutkom, kotrež tute předstawy wot 1918 hač do přitomnosće rozwiwachu. Wosebity fokus leži při tym na „přirodźe“ a na rumje. Praša so za tym, kak daloko su so objekty přirody, přirodne rumy, přirodne resursy kaž tež specifiske wužiwanje přirody do koncepcije Serbow jako narodna mjeńšina zapřijeli a kajke prawa so z wobchadom z přirodu a krajinu za Serbow wudachu? Tute prašenje so w ramiku dwěju dźělnych projektow wobdźěła, zo byštej so historiska kaž tež tučasna perspektiwa zwjazałoj. Projekt zepěra so při tym na teorije a metody, kotrež buchu w ramiku slědźenja za poćahami mjez čłowjekom a přirodu wuwite (Stawizny wobswěta, Political Ecology, Environmental Humanities). Při tym wužiwaja so w koncepcionelnym zmysle historisko-archiwaliske metody, diskursowe analyzy, kolektiwne kartěrowanje a kwalitatiwne interviewy.

Wobdźěłanje: Dr. Jana Piňosová (nawodnistwo), Marcel Langer