Digitalna samostatnosć bytostna za mjeńšiny

Nowa publikacija zjima wuslědki konferency

Pod titulom „Sorbische Lebenswelten im digitalen Zeitalter. Rückblick auf ein transdisziplinäres Forum“ (Serbske žiwjenske swěty w digitalnej dobje. Zhladowanje na transdisciplinarny forum) wozjewi Serbski institut dwanaty zešiwk swojich Sorabistiskich dźěłowych papjerow.

„Centralny wuslědk konferency je dopóznaće, zo je digitalna suwerenita za mjeńšiny kaž Serbow bytostna. Wona njewoznamjenja jenož přistup k digitalnym technologijam, ale zmóžni tež samopostejene wuhotowanje wobsahow, zwobraznjenow a platformow. Za to su trjeba naslědne infrastruktury, wotewrjene datowe modele, wjacerěčne wužiwarske powjerchi a sylniše splećenje akterow. Předstajene projekty pokazachu, zo ma serbska zhromadnosć jimacy kreatiwny a techniski potencial “, pisa Anca Claudia Prodan, PhD, organizatorka zarjadowanja a awtorka w swojej nowej publikaciju (hlej str. 38., konkluzije).

W měrcu 2025 organizowachu Serbski institut, BTU Choćebuz-Zły Komorow a DomPro transdisciplinarny forum Serbske žiwjenske swěty w digitalnej dobje w Choćebuzu. Zastupjerki a zastupjerjo z wědomosće a praksy diskutowachu wo móžnosćach a wužadanjach digitalizacije za serbsku kulturu. Nastorki za dialog dawachu pjeć tematiskich cyłkow na jewišću, world-café (paralelne mjeńše koła-dźěłarnički na wšelake temy w rotěrowacych zestawach) a wiki wustajerjow jako ramikowy program. Předležaca Sorabistiska dźěłowa papjera zjima wuslědki konferency.

Pozadk

Kak wobwliwuje digitalna technologija wašnje nastaća, zrozumjenja a sposrědkowanja kultury? To běše hłowne prašenje slědźerskeho projekta Serbske digitalne swěty. Přepytowanje kultury a technologije w 21. lětstotku, kotrež awtorka wot 2023 do 2025 při Serbskim instituće wobdźěłaše a kotryž je dźěl jeje habilitaciskeho předewzaća při BTU Choćebuz-Zły Komorow.

Publikacija

Sorabistiske dźěłowe papjery

W rjedźe spisow Sorabistiske dźěłowe papjery wozjewjeja so dźěła a rozprawy, zwjetša z projektow Serbskeho instituta. Jedna so při tym wo poziciske abo konceptowe papjery, dokumentacije (na př. dobrych, wupruwowanych přikładow) a podobne teksty z běžneho dźěła. Zešiwki su swobodnje přistupne (open access, ze swójskej DOI) na publikaciskim serweru Serbskeho instituta Qucosa.

Impresije konferency, program a krótka rozprawa:

• program a wobrazowa galerija konferency, hlej zarjadowanska stronka
• zhladowanje awtorki, wozjewjene bjezposrědnje po konferency we Wokolniku Serbskeho instituta