Dźeń wotewrjeneho pomnika 2025: Serbski institut so wobdźěli prěni raz

Prěni raz wotewrě Serbski institut swoje durje składnostnje Dnja wotewrjeneho pomnika, 14. septembra 2025. Prawidłownje předstaja Budyske wuměłstwowe towarstwo Britzec zahrodu šěrokemu publikumej jako zahrodu wuměłčow. Serbski institut poskići lětsa prěni raz dwě wjedźeni přez Serbsku centralnu biblioteku a Serbski kulturny archiw. Fachowědomostna referentka Anna Měrćinowa a wjednica archiwa, dr. Annett Brězanec, stej dźěławosć instituta, biblioteki a archiwa předstajiłoj. W magacinje prezentowaštej přeco něhdźe dźesać zajimcam pomniki serbskeho pismowstwa. Z wothłosom pokaza so Anna Měrćinowa, kotraž je kontakt z towarstwom nawjazała, spokojom.

Britzec zahroda za institutnym twarjenjom je jedna z mało zachowanych Budyskich wilowych zahrodow 19./20. lětstotka. Charakteristiska je łuka z dźiwimi kwětkami, lisćowcami, hrjadkami trajnych kwětkow a pawiljonom, kotraž so na kumštnu wyšinu wupřestrěwa. Tu je spóznajomna wulkomyslna gesta zamóžneho byrgarstwa. W lěće 2001 je Budyske wuměłstwowe towarstwo rekonstrukciju zahrody wotzamknyło a stara so hłownje wo hladanje. [wopisanje z programoweho zešiwka přewzate a přełožene]