30.8.: Knižne předstajenje a rozmołwa z awtorku wot “Maria Grollmuß (1896–1944). Biografische Annäherung und Erinnerungsnarrative”
Městno zarjadowanja: Serbski muzej, Hród 3, 02625 Budyšin
Zhromadne zarjadowanje ze Załožbu Sakske wopomnišća/Wopomnišćo Budyšin a Serbskim muzejom
18:00 hodź., wjedźenje po wosebitej wustajeńcy “Čej’ da sy? Korjenje w změnje. Dohlady do serbskeho katolskeho swěta”
19:00 hodź., dr. Birgit Sack předstaji w rozmołwje z dr. Jessicu Bock swoju monografiju “Maria Grollmuß (1896–1944). Biografische Annäherung und Erinnerungsnarrative”
Wo knize:
Napjate žiwjenje intelektualneje žony, formowane přez rewoluciju a politiku, spjećowanje a přesćěhowanje.
Promowowana historikarka Marja Grólmusec słušeše k tym Němcam, kotřiž so NS-režimej aktiwnje spřećiwjachu. Wotrostła bě wona w byrgarsko-katolskim staršiskim domje za čas kejžorstwa. Jeje žiwjenje skónči so z jenož 48 lětami w žónskim koncentraciskim lěhwje w Ravensbrücku.
Birgit Sack přirunuje dopomnjenske naratiwy, kotrež stilizuja Marju Grólmusec ke katolskej martrarce, serbskej patriotce, socialistiskej wojowarce abo zakitowarce žónskeje emancipacije, z jeje nutřkownymi přećiwnosćemi a měnjatym žiwjenskim pućom. Jako młoda žona wuwi so wot entuziastiskeje přiwisnicy noweje republiki k jeje rozsudźenej kritikarce. Tu kaž tam wojowaše bjezkompromisnje za swoje přeswědčenja.
Prěnja wědomostna biografija wo Mari Grólmusec skići nowe dohlady do sebjezrozumjenja studentskich organizacijow, kiž běchu republice swěrni. Biografija posrědkuje dale dohlady do njepřezjednosćow stalinizowaneje KPD kaž tež do njepřećelskich wobrazow w socialistiskim lěhwje, kotrež po 1933 zhromadnemu bojej přećiwo nacionalsocializmej napřećo stejachu.
(žórło: nakładnistwo Wallstein)
Wo awtorce:
Birgit Sack je historikarka a nawjeduje Wopomnišćo Mnichowske naměsto w Drježdźanach při Załožbje Sakske wopomnišća. K jeje slědźerskim ćežišćam liča spjećowanje a justicielne přesćěhowanje w nacionalsocializmje, žónske a splažne stawizny kaž tež politiski katolicizm we Weimarskej republice. Dr. Birgit Sack je jako PostDoc-stipendiatka w Serbskim instituće (1995–1997) započała z rešeršemi wo žiwjenju Marje Grólmusec a reflektowanju wo tym w regionalnej pomjatnej kulturje. Wot toho časa sem je swoje přepytowanja wobstajnje wudospołniła a wuhódnoćiła. W měrcu 2023 je wobšěrna biografija wo Mari Grólmusec w nakładnistwje Wallstein w Göttingenje wušła.
Wo moderatorce:
Dr. Jessica Bock studowaše srjedźne a nowše stawizny na Lipšćanskej uniwersiće. Ze stipendijom Zwjazkoweje załožby k předźěłanju SED-diktatury promowowaše na temu “Žónske hibanje we wuchodnej Němskej. Zběhnjenje – rewolta – transformacija w Lipsku 1980-2000”. Za swoju disertaciju, kotraž wuńdźe w lěće 2020 w nakładnistwje Mitteldeutscher Verlag, dósta w lěće 2019 disertaciske myto GenderConceptGroup Techniskeje uniwersity w Drježdźanach. Wot 2016 je Jessica Bock wědomostna sobudźěłaćerka při Digitalnym němskim žónskim archiwje. Tuchwilu zdźěłuje w nadawku towarstwa “Weiterdenken – Heinrich Böll Stiftung Sachsen” brošurku wo přetorhnjenju samodruhosće w Sakskej mjez 1945 a 1989/90.