Pytanje Lochka rěč Stronu předčitać zwobraznjenje
 Pytanje  Lochka rěč  Stronu předčitać  zwobraznjenje
Budyšin - 19.03.2026

Nowe Spisy Serbskeho instituta: Wölfe erzählen. Eine Ethnografie vielartiger Narrative der Lausitz

Wölfe erzählen_Cover
Spisy 73 / Wölfe erzählen

Rozmołwa z awtorku Marlis Heyer při wustajenišću Frank & Timme na Lipšćanskich knižnych wikach

Dypkownje ke knižnym wikam w Lipsku wuńdźe zwjazk čo. 73 Spisow Serbskeho instituta. Nimo ćišćaneho wudaća předleži kniha darmotnje a swobodnje přistupna we formje open access. Jutře, dnja 20. měrca 2026, 14:00 hodź. předstajitej Marlis Heyer a sobuwudawaćelka Spisow dr. Susanne Hozyna publikaciju při wustajenišću Berlinskeho wědomostneho nakładnistwa Frank & Timme, kotryž nakładuje wot lěta 2026 rjad Spisow Serbskeho instituta.

Wobsah

Łužica, w nalěću lěta 2000: Prěnja črjóda wjelkow so w Zwjazkowej republice Němskej zadomjuje. Něhdy wutupjena družina přeslědźuje w sylnej měrje změnjeny kraj. Wot wšeho spočatka přewodźuja a sobu formuja powědki rozpřestrěće wulkich rubježnych zwěrjatow. Při tym storča nowe dopóznaća na traděrowanu wědu wo zhromadnym žiwjenju wjelka a čłowjeka. Štó pak wo kim powěda? A što so wujednawa, hdyž dźe wo „nawrót wjelkow“?
Marlis Heyer rysuje – so złožujo na empiriske studije we Łužicy – kompleksny wobraz regiona w přewróće. Při tym njedodni jenož prašenja za zhromadnym žiwjenjom čłowjeka a wjelka, ale zhladuje z pomocu wšelakich teorijow tež na móžnosće a hranicy slědźenja wo čłowjeskim powědanju.

Wo awtorce

Marlis Heyer wotrosće w „samych pěskach“ Braniborskeje marki mjez chójnami a jězorami. Po dobrowólnym ekologiskim lěće studowaše europsku etnologiju a slawistiku w Berlinje, Poznanju a Waršawje. Přiwobroći so duchownowědomostnemu přeslědźenju poćahow mjez čłowjekom a přirodu. Po slědźenju wo „nawróće wjelkow“ na Uniwersiće Juliusa Maximiliana we Würzburgu změni do praktiskeho dźěła a skutkuje wot lěta 2021 za přirodoškitny zwjazk.

Pozadk

Předležace slědźerske dźěło bu w lěće 2025 wot filozofiskeje fakulty Uniwersity Juliusa Maximiliana we Würzburgu jako disertacija přiwzate. Bazuje na přepytowanjach we wobłuku DFG-projekta „Die Rückkehr der Wölfe. Kulturanthropologische Studien zum Prozess des Wolfmanagements in der Bundesrepublik Deutschland“, kotryž je prof. dr. Michaela Fenske nawjedowała. Marlis Heyer běše mjez 2018 a 2020 asociěrowana doktorandka Serbskeho instituta. Serbski institut zarjadowaše zhromadnje z katedru za europsku etnologiju Würzburgskeje uniwersity a z Institut za socialnu antropologiju a empirisku kulturnu wědomosć Uniwersity Zürich w juniju 2028 konferencu „Encounters with Wolves: Dynamics and Futures“ (konferencny zwjazk (open access): Mały rjad 32) w Budyšinje.

Kompaktne informacije: