Rozdźěle a přisłušnosć: Indigene a awtochtone narodne mjeńšiny w so měnjacych regionach Europy

Wjace hač 100 milionow ludźi w Europje přisłuša po charće FUEN jednej z wjace hač 300 narodnych mjeńšin. Tute zhromadźenstwa – definowane přez awtochtoniju abo indigenosć kaž pola Sámi – su hustohdy w nakromnych wjesnych a namjeznych kónčinach žiwe. Jich sydlenski rum njeje při tym jenož historisce zrosćeny kulturny a rěčny rum, ale tež socioekonomiski žiwjenski zakład. W nowembru 2025 tematizowaše Serbski institut w kooperaciji z Leibnizowym institutom za krajowědu (IfL) Lipsk a z BTU Choćebuz-Zły Komorow tute wzajomne skutkowanja na mjezynarodnej konferency w Lipsku. W srjedźišću stejachu poćahi mjez kulturnymi, politiskimi kaž tež ekonomiskimi transformaciskimi procesami w europskich mjeńšinowych regionach a jich wuskutki na přichod tutych zhromadźenstwow.

Zaměr projekta je wudawanje wubranych konferencnych přinoškow w interdisciplinarnym wosebitym zešiwku časopisa „Lětopis – Časopis za sorabistiku a přirunowace mjeńšinowe slědźenje“. Publikacija zrealizuje so we wuskim zhromadnym dźěle z dr. Frankom Meyerom (IfL) a prof. dr. Ludgerom Gailingom (BTU Choćebuz-Zły Komorow).