Inwentar za kwalitatiwne slědźerske daty (dźěłowy titul)

Interviewy a rozmołwy su hódne metody w socialno- a kulturnowědomostnym slědźenju. Jich zawěsćenje w formje awdijowych nahrawanjow, transkripcijow a protokolow zaruči sćěhowace: 1. dokumentowanje slědźenskeho procesa, 2. spěchowanje transparency a z tym přepruwujomnosće slědźenja, 3. nastawanje empiriskeho materiala za dalše slědźerske projekty.

W sorabistice hraja kwalitatiwne slědźenske metody hižo wjele lět wažnu rólu. W Serbskim instituće předleži hižo tójšto interviewowych nahrawanjow, transkriptow a dokumentacijow ze wšelakich stawizniskich, kulturnowědomostnych a rěčespytnych projektow. Zaměr projekta je, tute slědźenske daty wotkryć a za přichodne slědźenje lěpje spřistupnić. Za to ma so inwentar zestajić, w kotrymž so informacije wo sorabistiskich interviewach a rozmołwach na centralnym městnje zběraja, zo bychu so móhli lochko namakać a přepytować. Projekt ma wjacore zaměry:

• hromaduwjedźenje, rjadowanje a kontekstualizowane zapisanje interviewow a rozmołwow z projektow Serbskeho instituta
• digitalne wozjewjenje slědźerskich datow po FAIR-principach
• stworjenje fasetěrowanych pytanskich móžnosćow za zwěsćene daty

Inwentar spřistupni přichodnemu slědźenju bohaty a dale rosćacy fundus empiriskich datow a zmóžni runočasnje stajenje nowych sebjerefleksiwnych prašenjow na swójsku slědźersku praksu a fachowe stawizny.