Kulturnowědomostne perspektiwy na digitalizaciju imaterielneje kultury

Imaterielne kulturne herbstwo (IKH) da so hakle přez wukonjenje wožiwić a dožiwić. Tole je wužadanje za digitalizaciju. We wobłuku projekta třećich srědkow „Praktiki imaterielneho kulturneho herbstwa w Delnjej Łužicy“ natwarja so tuchwilu datowa banka z dopokazami lokalnje wukonjanych praktikow IKH. Z tutoho dźěła wuchadźeja prašenja mjez druhim k systematiskej nomenklaturje kaž tež k přiměrjenemu modelěrowanju tutych datow. Dokelž pak stejitej digitalne zapisanje a reprezentacija kulturnych praktikow hišće na spočatku, pobrachuja přisłušna fachowa literatura kaž tež dobre přikłady k orientaciji. Tuž je hłubšo sahace interdisciplinarne rozestajenje ze skicěrowanymi problemowymi wobłukami trěbne.
W kooperaciji z Institutom za dźiwadłowu wědomosć a z Rejowanskim archiwom w Lipsku, z Poradźowarnju a slědźenišćom k IKH při Instituće za sakske stawizny a ludowědu kaž tež ze zapřijećom konsorcija NFDI4Culture wutwori so dźěłowa skupina k zapisowanju datow IKH. Skupina skića rum za wuměnu nazhonjenjow k digitalizaciji imaterielnych kulturnych formow a za diskusiju na to sćěhowacych kulturnowědomostnych prašenjow. Zaměr je, zhromadnje inowatiwne rozrisanja nadźěłać a namjety za standardy w přichodźe wuwiwać. Wuslědki maja so sukcesiwnje do wědomostneho diskursa zapřijeć.