Rěčespytnik Serbskeho instituta na profesora powołany
Slawist a priwatny docent dr. Thomas Menzel w Serbskim instituće w Budyšinje bu 30. oktobra wot prezidenta Oldenburgskeje Uniwersity Carla von Ossietzkeho, prof. dr. Pipera, na nimorjadneho profesora powołany.
Wot 1995 je rěčespytnik Thomas Menzel wědomostny sobudźěłaćer na wšelakich uniwersitach w němskorěčnym rumje, najprjedy w Oldenburgu, pozdźišo tež w Greifswaldźe a Regensburgu. We Freiburgu a Wienje je rěčespytne profesury zastupował. Thomas Menzel je slědźerske projekty k rěčnym změnam w morfologiji a syntaksy słowjanskich rěčow, k němskim požčonkam w pólšćinje a jeje dialektach a k rěčnemu kontaktej mjeńšinowych rěčow přewjedł. Poskića čitanja a seminary wo kulturnych stawiznach słowjanskich ludow, wo pólskej a ruskej gramatice a rěčnych stawiznach kaž tež wo słowjanskich mjeńšinowych rěčach, mjez druhim kašubšćinje, rusinšćinje a burgenlandskej chorwatšćinje. 53-lětny Thomas Menzel dźěła wot lěta 2016 w Serbskim instituće w Budyšinje we wotrjedźe za rěčespyt.
Prof. dr. Gun-Britt Kohler, direktorka Instituta za slawistiku w Oldenburgu hódnoći slědźenje Menzela: “Wědomostny profil knjeza dr. Menzela wuznamjenja so najprjedy jónu na wusahowace wašnje přez swoju nimorjadnu šěrokosć, kotraž je nimale jeho jónkrótne znamjo. Wón słuša k małej ličbje młódšich slawistkow a slawistow, kotřiž su wo wjace hač dwěmaj słowjanskimaj rěčomaj publikowali – pólšćina, rušćina, ukrainšćina, běłorušćina, łemkowšćina, serbišćina, chorwatšćina, kašubšćina, hornjo- a delnjoserbšćina.”
Wot lěta 2017 dźěła Thomas Menzel, nimo swojeho slědźenja k serbskej gramatice, na sorabistiskim přinošku za Słowjanski rěčny atlas Mjezynarodneho komiteja slawistow sobu. Tutón rěčny atlas je dołhodobny multilateralny slědźerski projekt słowjanskich krajow a Němskeje. Je to prěnje makrodialektologiske předewzaće, kotrež zjima informacije wo dialektnych rozdźělach we wobłuku cyłeje rěčneje swójby.
Wot lěta 2018 je Thomas Menzel tež sobustaw Komisije za słowjanske rěčne kontakty při Mjezynarodnym komiteju slawistow. Komisija so zaběra z wliwom, kotryž ma kontaktna abo susodna rěč na gramatiku a słowoskład přepytowaneje rěče. Wot lěta 2020 zastupuje Menzel Serbow w Mjezynarodnym komiteju slawistow, kotryž wuhotuje kóžde pjeć lět Mjezynarodny kongres slawistow.
Tež direktor Serbskeho instituta, dr. Hauke Bartels, wjeseli so přez spožčenje titula: “Je wažne, so ze sorabistiskim rěčespytom přeco tež we wjetšim konteksće slawistiki zaběrać. Runje w tutym wobłuku wudospołnja cyłkowny profil Thomasa Menzela idealnje rěčespytny wotrjad Serbskeho instituta. Wjeselu so, zo smy jeho za sorabistiku dobyć móhli a zo dóstanu jeho slědźenja z nowym titulom připóznaće. Ze swojim wuwučowanjom budźe dale zajim za Serbow a serbšćinu budźić móc.”
Prof. dr. Gerd Hentschel, něhdy doktorski nan priwatneho docenta dr. Thomasa Menzela w Instituće za slawistiku w Oldenburgu: “Na městno wučersko-šulerskeho poćaha je chětro spěšnje kolegialny poměr stupił, kotryž so naposled w lisćinje zhromadnych publikacijow špiheluje. Thomas Menzel zwjazuje přikładnje profundne a šěroke znajomosće słowjanskich rěčow w arealnym a chronologiskim nastupanju z teoretiskej orientaciju w modernym rěčespyće. Wón je narodnje a mjezynarodnje připóznaty a za Oldenburgsku slawistiku a – kaž so nadźijam – tež za jeho nětčišu akademisku domiznu, Serbski institut, dobra wizitka.”
Thomas Menzel bydli nětko štyri lěta we Łužicy a rěči mjeztym hornjoserbsce.