Serbske kulturne pomniki online
Nowa zběrka w sorabistiskim portalu wědy SORABICON Serbskeho instituta
Wot hrodow Słowjanow w srjedźowěku hač k načasnemu twarskemu wuměłstwu: Nowy digitalny atlas serbskich kulturnych pomnikow pokazuje materielne swědki serbskich stawiznow a serbskeje kultury w zjawnym rumje Hornjeje a Delnjeje Łužicy. Tuchwilu wopřijima 78 pomnikow, napismow, wuměłstwowych twórbow na twarjenjach, wopomnišćow a skulpturow. Braniborski dźěl wobsahuje 52 objektow w Choćebuzu, sakski 26 w Budyšinje. Zběrka so njepřestawacy rozšěrja.
W nowej SORABICON-zběrce móžeće serbske kulturne pomniki po wšelakich pućach přeslědźić – z interaktiwnymi kartami, ze zaměrnym pytanjom w objektowym zapisku abo prosće při přehrjebanju informacijow. Po tematice zrjadowane zapiski přeproša wužiwarja mnohotnosć serbskich twarskich swědkow a pomnikow zeznawać. Za lěpšu orientaciju su zapisane kulturne pomniki po tematice zrjadowane. Zhubjene abo zničene objekty su z dypkatymi symbolemi woznamjenjene.
Što je SORABICON?
Wjacerěčny sorabistiski portal wědy SORABICON je digitalny a z modulow natwarjeny leksikon za wšěch, kiž so za serbsku kulturu, rěč a za serbske stawizny zajimuja – z informatiwnymi artiklemi, mnoho fotami a widejemi a tež z originalnymi nahrawanjemi časowych swědkow a dalšim nazornym materialom. Tuchwilu je na portalu dwanaće zběrkow wozjewjenych, mjez druhim wo žiwym kulturnym herbstwje w Delnjej Łužicy, wo serbskich slědach w čěskich Warnoćicach, wo Slepjanskej rěčnej krajinje a digitalny serbski kulturny leksikon. Po potrjebje maja so tomu nowe zběrki z wuslědkami sorabistiskeho slědźenja Serbskeho instituta přidružeć.
pokiw: Na rěči zajimowani nadeńdu nimo toho we woběmaj rěčnymaj portalomaj dolnoserbski.de a hornjoserbsce.de wobšěrny material (ze słownikami, wujasnjowanjemi mjenow, tekstowymi zběrkami, rěčnymi wobrotami, awdijodatajemi a z dalšimi resursami.
Dale čitać:
- Serbske kulturne pomniki digitalnje zapisane (nowinska zdźělenka wot 15.12.2025)
- wosebity poskitk w jubilejnym lěće Serbskeho instituta: přednošk “Serbske kulturne pomniki” w rjedźe “Sorabistika po puću”