Serbske kulturne pomniki online
Nowa zběrka na portalu sorabistiskego wěźenja SORABICON wót Serbskego instituta
Wót srjejźowěkowych słowjańskich grodow až k modernemu wuměłstwu we twaŕskej kulturje: Nowy digitalny atlas serbskich kulturnych pomnikow prezentěrujo materielne wopokazma serbskeje historije a kultury we zjawnem rumje Górneje a Dolneje Łužyce. Tuchylu wopśimjejo ta zběrka 78 pomnikow, napismow, wuměłskich twóŕbow we twaŕskej kulturje, městow spominanja abo skulpturow. Bramborska źělba zběrki wopśimjejo aktuelnje 52 objektow w Chóśebuzu, sakska źělba 26 objektow w Budyšynje. Ta zběrka bywa wobstawnje wětša.
We tej nowej zběrce portala SORABICON móžoš serbske kulturne pomniki na wšaki part pytaś a namakaś – pśez interaktiwne kórty, pśez zapis objektow abo pśez pśeglědowanje kradu za spódobanim wužywarja. Wopisanja objektow su źělone pó temach a daju wužywarjam góźbu, aby se z bogatstwom serbskeje twaŕskeje kultury a pomnikow wopóznali. K lěpšej orientaciji su kulturne pomniki do tematiskich kategorijow rozdźělone. Zgubjone abo skóńcowane objekty su wóznamjenjone z dypkatymi symbolami.
SORABICON – co to jo?
SORABICON, to jo wěcejrěcny portal sorabistiskego wěźenja Serbskego instituta. Wón jo natwarjony modularnje a słužy ako digitalny leksikon za wšykne, ako se interesěruju za serbsku kulturu, rěc a historiju – z informatiwnymi artikelami, wjelimi fotami, ale teke videofilmami a z originalnym głosom casowych znankow a dalšnym materialom k woglědanju. Tuchylu jo 12 zběrkow wózjawjonych, mjazy drugim k žywemu kulturnemu derbstwu w Dolnej Łužycy, k serbskim slědam we Varnsdorje (Čechojska republika), k slěpjańskej rěcnej krajinje abo Serbski kulturny leksikon (standardowe źěło). Za pótrjebnosću nastanu nowe zběrki z rezultatami sorabistiskego slěźenja na Serbskem instituśe.
Pokazk: Chtož se interesěrujo za serbsku rěc, namakajo wušej togo na rěcnyma portaloma dolnoserbski.de a hornjoserbsce.de wobšyrny material (ze słownikami, rozkłaźenim mjenjow, zběrkami tekstow, pśisłowami a wobrotami, zukowymi datajami a dalšnymi resursami).
Cytajśo wěcej:
- Serbske kulturne pomniki digitalnje zapisane (casnikaŕska powěsć (górnoserbska) wót 15.12.2025)
- wósebne pórucenje: pśednosk „Serbske kulturne pomniki“ we rědu „Sorabistika pó droze“