Sorabistiske přinoški k Dnjej slawistiki w Bochumje

Wot 21. do 24. septembra 2022 wotmě so na uniwersiće w Bochumje 14. Dźeń němskeje slawistiki, kotryž bu wot Zwjazka němskeje slawistiki, třěšneje organizacije slawistiskich kulturnych, literaturnych a rěčespytnych wědomosćow na němskich wysokich šulach organizowany. Třo rěčespytnicy Serbskeho instituta su tam swoje sorabistiske slědźenja předstajili. Leńka Šołćic je hromadźe z prof. dr. Tanju Anstatt wo prěnich wuslědkach pólneho slědźenja w ramiku planowaneho zhromadneho projekta přednošowała a zwuraznjenje žiwosće a wirilnosće w hornjoserbskej wobchadnej rěči a w pólšćinje w Němskej (Sewjernorynsko-Westfalska) přirunowała. Při tym su so tež sociolinguistiske faktory a wuměnjenja tuteju dweju mjeńšinoweju rěčow přirunajo předstajili. Thomas Menzel zaběraše so w swojim přednošku “Genderowa linguistika serbšćiny jako fenomen rěčneho kontakta” z problemami, kotrež móža na zakładźe absolutneje dwurěčnosće Serbow z njereflektowaneho přenjesenja genderlinguistiskich přistupow z němčiny do serbšćiny wuńć. Wón předstaji mnohotnosć móžnych wotpowědowanjow genusa a splaha w hornjoserbskim słowoskładźe. Jana Šołćina předstaji na podijumowej diskusiji wo fachowej didaktice z titulom “Prestiž rěče, pochad, identita? Wliw faktorow na situaciju słowjanskich rěčow na šulach” aktualne wuwića w dwurěčnych šulach Hornjeje a Delnjeje Łužicy a wopisowaše wužadanja při wuwučowanju serbšćiny jako maćerna, druha a cuza rěč.

Nimo toho bě serbšćina tež w dwěmaj přednoškomaj wonkownych wědomostnikow zastupjena: W sekciji wo słowjanskich mjeńšinowych rěčach přednošowaše Walter Breu k temje “Přirunanje awtochtoneho rěčneho kontakta: molisanska słowjanšćina vs. hornjoserbšćina”. Ludger Paschen (Leibniz-Zentrum Allgemeine Sprachwissenschaft Berlin) referowaše w swojej sekciji k pragmatice słowjanskich rěčow wo “Wobkedźbowanjach k finalnemu podlěšenju před rěčnymi přestawkami w delnjoserbšćinje”.