Jedne swójbne mjeno, tři formy. Přednošk skići stawnicam a stawnikam dohlady do tradicije serbskich mjenow

Wo wosebitosćach serbskich swójbnych mjenach je rěčespytnica dr. Anja Pohončowa 17. oktobra w Drježdźanach před stawnicami a stawnikami přednošowała. Přednošk z titulom „Delan – Delanowa – Delanec. Ein Familienname, drei Formen – Einblicke in die sorbische Namenstradition“ (Jedne swójbne mjeno, tři formy – Dohlady do tradicije serbskich mjenow) wotmě so we wobłuku lětneho zeńdźenja sakskeho krajneho fachoweho zwjazka stawnikow (Landesfachverband der Standesbeamtinnen und Standesbeamten im Freistaat Sachsen e.V.). Běše to druhi tajki přednošk. Hižo loni je rěčespytnica Serbskeho instituta pola Zwjazkoweho zwjazka stawnikow w Němskej (Fachtagung des Bundesverbandes der deutschen Standesbeamtinnen und Standesbeamten e.V.) w Fuldźe přednošowała. Wony přednošk je mjeztym wozjewjeny we fachowym časopisu “Das Standesamt”. W Drježdźanach je so knj. Pohončowa přidatnje z prašenjemi wokoło dwójnych mjenow zaběrała.

Z dwójnymi swójbnymi mjenami zaběraše so Anja Pohončowa tež njedawno w swojim Rěčnym kućiku w Serbskim rozhłosu, hlej www.mdr.de/serbski-program/rozhlos/artikel-1390.html.