Što je poprawom „serbske“ imaterielne kulturne herbstwo?

Imaterielne kulturne herbstwo zwuraznja so w kulturelnych praktikach, na přikład w ertnym daledawanju tradicijow, w předstajacym wuměłstwje, w towaršnostnych nałožkach, ritualach a swjedźenjach, w poměrje čłowjeka k přirodźe a we wobchadźe z wědu wo tradicionalnych rjemjesłach. Jedna so potajkim wo žiwe kulturne formy, kotrež bjezposrědnje ludźo z wotpowědnej wědu a z wosebitymi kmanosćemi noša.

Hdy pak stanje so imaterielne kulturne herbstwo „serbske“? Přez čo so wone wuznamjeni? Kak so wone praktikuje, škita, dale dawa abo tež zwičnja? Wuchadźejo z pomjenowanja „Towaršnostnych nałožkow a swjedźenjow Łužiskich Serbow w běhu lěta“ jako imaterielne kulturne herbstwo přez Němsku UNESCO-komisiju w lěće 2014 sćěhujemy mjenowanym prašenjam zhromadnje w přednošku, kotryž je bohaće zwobraznjeny. W sćěhowacej rozmołwje je składnosć za prašenja, přispomnjenja a diskusiju.

tekst: Ines Kellerowa, Theresa Jacobsowa

• format
  ilustrowany přednošk z rozmołwu
• referent/ka
  Theresa Jacobsowa, Ines Kellerowa
• doba zarjadowanja
  ca. 60 mjeńš.
• rěč
  Deutsch, Obersorbisch
• techniske wuměnjenja
  beamer, płatno
• Na koho so zarjadowanje měri?
  skupiny nošerjow IKE, towarstwa a iniciatiwy, muzeje a domizniske stwy, kubłanišća