Drježdźany - 03.06.2022

Wito Bejmak lawreat Myta Zejlerja 2022

Medijowa zdźělenka Sakskeho statneho ministerstwa za kulturu a turizm wot 2. junija 2022

Myto za serbsku rěč “Myto Zejlerja” spožči so lětsa Witej Bejmakej. Sydomčłonska jury bě lawreata Sakskej statnej ministerce za kulturu a turizm Barbara Klepsch za jeho mnohostronske skutkowanje jako pućrubar za wužiwanje serbskeju rěčow wosebje w digitalnym swěće doporučiła.

Z 5.000 eurami dotěrowane Myto Zejlerja Sakskeje statneje ministerki za kulturu a turizm wuznamjenja wusahowace abo přikładne wukony na polu přiswojenja, wužiwanja kaž tež posrědkowanja serbskeje rěče.

“Gratuluju Witej Bejmakej wutrobnje a wjeselu so, zo so z tutym mytom jeho wobšěrny angažement oficialnje hódnoći. Spožčenje myta za serbsku rěč Myta Zejlerja je prawidłownje z wobstatkom 2. plana naprawow knježerstwa Sakskeje za posylnjenje a wožiwjenje nałožowaneje serbšćiny. Skutkowanje Wita Bejmaka pokazuje na přikładne wašnje, kak hodźi so rěč Serbow profesionalnje, kreatiwnje a iniciatiwnje za jeje nałožowarjow na přichod wusměrić “, wuzběhnje statna ministerka Barbara Klepsch.

Wito Bejmak je informatikar a jedyn z wupokazanych ekspertow za nałožowanje serbskeje rěče w digitalnam swěće a nowych medijach. Tež dźakowano jeho rozsudnym iniciatiwam a wysokemu wosobinskemu zasadźenju hodźi so serbska rěč dźensa w nowych medijach šěroko nałožować a je wšitkim nałožowarjam a zajimcam přistupna.

Hižo zahe programěrowaše Wito Bejmak ćěrjaka za wućišćenje serbskorěčnych dokumentow. Slědowaše wuwiće tastaturoweho ćěrjaka za pisanje w serbskej rěči při kompjuteru w dźěłowym systemje Windows NT, kaž tež konwertěrowanskeho programa za serbske kompjuterowe teksty na nowy Unicode-standard. Zhromadnje z kolegu nawjaza Wito Bejmak 2005 zwisk k předewzaću Microsoft a docpě, zo stej wot toho časa hornjo- a delnjoserbšćina jako oficialnej rěči w dźěłowym systemje Windows kruće etablěrowanej. Zdobom wuwi digitalny słownik za serbsku rěč, kotryž je kmany za wšědny dźeń. A z dalšim kolegu inicialnje nastorčił je projekt “Soblex” (https: //soblex.de/) a prawopisnu kontrolu na zakładźe wobšěrneho digitalneho serbskeho słownika za tekstowe programy kaž MS Word a Open Office. Nimo toho je Wito Bejmak zamołwity za inicialne zapřijeće serbskich rěčnolokalizaciskich informacijow za kompjuterowy swět w mjezynarodnym Unicode CLDR projekće (hlej https://cldr.unicode.org/index/acknowledgments). Tute dodawa rozsudnje rěčne lokalizaciske informacije za mobilne posłužowanske systemy kaž Android a iOS.

Tak połoži Wito Bejmak nimo swojeje powołanskeje dźěławosće wot 90tych lět sem zakłady za digitalne nałožowanje serbskeje rěče a z tym tež serbskeje kultury a namrěwstwa. Byrnjež powołansce wjele lět zwonka Łužicy a we wukraju  skutkował, měješe intensiwny kontakt do swojeje domizny. Wot 2016 je nawoda Serbskeje centralneje biblioteki kaž tež Serbskeho kulturneho archiwa w Serbskim instituće w Budyšinje. Tuchwilu slědźi a twari na přikład na spóznawanskich modulach za awtomatizowane spóznaće pisma (OCR) serbskich tekstow na wobrazach.

Tež w analognym swěće angažuje so Wito Bejmak na wšelakore wašnje za serbsku rěč. Přez dźěłowy kružk “Robotika” na Serbskej zakładnej šuli w Radworju na přikład zeznajomni šulerki a šulerjow ze serbskimi fachowymi wurazami a je sobustaw předsydstwa staršiskeje iniciatiwy Radwor, kotraž wěnuje so serbskemu a digitalnemu kubłanju dźěći.

Daloko znate je jeho wjelelětne skutkowanje na serbskich jewišćach jako kabaretist a libretist. Wot 1990tych lět je čłon regionalnje nimoměry wuspěšneje kabaretneje skupiny Lózy hólcy jako tekstar kaž tež jako sobuskutkowacy. W tutej kajkosći skutkowaše kabaretistisce w dalšich skupinach. Za šěsć ptačokwasnych programow Serbskeho ludoweho ansambla je wón librety napisał.

We wopodstatnjenju jury rěka w serbskej rěči:

Myto za serbsku rěč Myto Zejlerja 2022 spožči so knjezej Witej Bejmakej za jeho mnohostronske skutkowanje jako pućrubar wužiwanja serbskeje rěče wosebje w digitalnym swěće.

Myto spožči so wot lěta 2014 kóžde druhe lěto a nosy mjeno basnika, publicista a teologi Handrija Zejlerja (1804-1872). Handrij Zejler wobhladuje so jako załožer moderneje serbskeje literatury. Myto ma so nazymu 2022 we Łazowskej ewangelskej cyrkwi přepodać. Handrij Zejler skutkowaše tu wot lěta 1835 hač do swojeje smjerće 1872 jako farar.

Wotkaz k medijowej zdźělence SMKT