Serbski institut pyta za rěčespytny wotrjad k najblišemu terminej
wědomostneho sobudźěłaćerja/wědomostnu sobudźěłaćerku (ž/m/d) we wobłuku kompjuteroweje linguistiki/digitalnych rěčnych resursow.
Jedna so wo połne městno, kotrež je tuchwilu wobmjezowane na tři lěta. Jeli wobsteji přeće, je tež dźělnočasowe přistajenje předstajomne. Mzda płaći so po TV-L (E13), jeli su wosobinske wuměnjenja date.
Serbski institut je zwonkauniwersitne interdisciplinarne slědźenišćo z něhdźe 60 sobudźěłaćerjemi/sobudźěłaćerkami na dwěmaj městnomaj (Budyšin a Choćebuz). Wón přeslědźuje rěč, kulturu a stawizny Serbow w Hornjej a Delnjej Łužicy w zańdźenosći a přitomnosći. Integralnej wobstatkaj instituta stej Serbski kulturny archiw a Serbska centralna biblioteka.
Waše nadawki:Z wupisanym městnom ma so zesylnić naš team, kiž dźěła na serbskich digitalnych rěčnych resursach, zo by so dotal předewšěm za delnjoserbšćinu wuwity informaciski poskitk hladał a wutwarił (hlej
dolnoserbski.de ). Na podobne wašnje maja so tež za hornjoserbšćinu rěčne resursy zdźěłać a poskićić (hlej
hornjoserbsce.de – w natwarje). W tutym wobłuku je mjez druhim planowana dalša retrodigitalizacija słownikow na bazy XML kaž tež wobdźěłanje a anotacija korpusowych tekstow (TEI). Zaměr je srjedźodobny natwar wobšěrneje slědźerskeje infrastruktury za wobdźěłanje, wuhódnoćenje a poskićowanje tajkich resursow.
Waš profil:
- wotzamknjene wotpowědne wysokošulske kubłanje na polu kompjuteroweje linguistiki, alternatiwnje na polu informatiki z wotpowědnym wusměrjenjom; ewentualnje tež na polu digital humanities abo duchownowědomostneje discipliny z wotpowědnym přidatnym wukubłanjom abo powołanskimi nazhonjenjemi
- wobšěrne nazhonjenja na polu programěrowanja (wokolina Java, dale na př. Python)
- wěste wobchadźenje z XMLowymi technologijemi (XSLT, JAXP, Saxon, na př. Oxygen XML Editor)
- znajomosće na polu weboweho wuwića (full stack; tuchwilu předewšěm na bazy JAVA/Servlets)
- znajomosće na polu awtomatiskeho předźěłanja rěče na bazy tekstow (korpusowa linguistika, linguistiska informatika, digitalna leksikografija, text mining)
- zwólniwosć k sobudźěłu w interdisciplinarnych projektach na polu digitalnych duchownych wědomosćow; jara dobre analytiske kmanosće kaž tež dobra komunikaciska kompetenca a teamakmanosć
Wočakuje so nimo toho zwólniwosć k sobudźěłu w serbskorěčnej wokolinje a k přiswojenju hornjo- abo delnjoserbšćiny – při tym skići institut podpěru. Dźěło z wjacerěčnymi datami je w Serbskim instituće wšědna praksa, znajomosć słowjanskich rěčow je při tym wužitna. Zwólniwosć k wotpowědnemu dalekubłanju je trěbna.
Serbski institut poskića Wam wotměnjawu, dynamisku a interdisciplinarnu dźěłowu a slědźersku wokolinu tež z dlěšodobnej perspektiwu. Stajna přitomnosć na dźěłowym městnje (w Budyšinje abo Choćebuzu ze zapřijećom přeco tamneho stejišća) njeje trěbna. Wjeselimy so na Waše powabjenje!
Serbski institut spěchuje powołanske runostajenje žonow a muži a zasadźuje so za zjednoćomnosć powołanja a swójby. Tohodla su žony wosebje namołwjene so powabić. Na wosebite wobkedźbowanje ćežko zbrašenych při jenakej kwalifikaciji so dźiwa.
Waše požadanje pósćelće prošu najpozdźišo hač
do 1. oktobra 2021 z trěbnymi podłožkami a jenož
w digitalnej formje (e-mejlka z přiwěškom w formaće pdf) do direktorata Serbskeho instituta na adresu
si@serbski-institut.de. Tež pozdźišo dochadźace prócowanja móža so wobkedźbować, jeli je městno hišće njewobsadźene.
Pokiw k škitej datow: Ze zapodaćom swojeho prócowanja přihłosujeće předźěłanju Wašich wosobinskich datow we wobłuku a k přewjedźenju procesa požadanja. Tute přizwolenje móže so kóždy čas bjez podaća přičin pisomnje abo elektronisce napřećo direktoratej cofnyć. Prošu wobkedźbujće, zo wjedźe cofnjenje přizwolenja k tomu, zo njemóže so Waše požadanje w běžacym požadanskim procesu hižo wobkedźbować.
Hornjoserbsce
Deutsch
English
Dolnoserbski
