Mjezynarodny lětni kurs za serbsku rěč a kulturu 2026

Dohromady 43 ludźi w starobje mjez 21 a 74 lětami z 10 krajow wobděli so na lětušim lětnim kursu Serbskeho instituta za serbsku rěč a kulturu. Najwjace wobdźělnikow přińdźe z Němskeje a Pólskeje, tež Čěska republika je derje zastupjena. Dalši zajimcy přińdu z Awstriskeje, Serbiskeje, Słowakskeje, Słowjeńskeje, Tadźikistana, Ukrainy a USA. Něhdźe połojca wobdźělnikow hišće studuje. Dźěl kursantow chce so powołansce we wobłuku slawistiki ze serbšćinu zaběrać. Druzy maja wosobinske přičiny, na př. serbskich prjedownikow abo serbskeho partnera.

Rěčespytnik dr. Fabian Kaulfürst, kotryž kurs wospjet nawjeduje, so wjeseli: »Směmy zaso zajimawych ludźi z cyłeho swěta w rozdźělnych starobach a ze wšelakimi wosobinskimi motiwacijemi witać. To je garant za jimace zetkanja a wuspěchi při wuknjenju.«

Kurs, kotryž so na slawistow, studowacych slawistiki z tu- a wukraja a na wšěch na serbšćinje zajimowanych měri, wotměje so wot 24. julija hač do 8. awgusta w rumnosćach Serbskeho internata a Serbskeho gymnazija w Budyšinje. Kóžde druhe lěto wuhotuje Serbski institut intensiwny kurs.

• powšitkowne informacije wo lětnim kursu