Z přepodaćom wopismow dźensa zakónči lětuši Mjezynarodny lětni kurs za serbsku rěč a kulturu w Budyšinje
Na lětušim Mjezynarodnym lětnim kursu za serbsku rěč a kulturu Serbskeho instituta w Budyšinje wot 24. julija hač do 8. awgusta wobdźělichu so 40 wosobow z dźesać krajow. 23 kursistow je so na pruwowanju za certifikat serbšćiny wobdźěliło. Składnostnje dźensnišeho zakónčenja intensiwneho kursa přepoda dr. Fabian Kaulfürst, nawoda kursa a wotrjadnik rěčespyt Serbskeho instituta, wšěm wobdźělnikam wopisma, zdźěla z certifikatom. Wot prěnjeho lětnjeho kursa su 906 zajimcow na intensiwnym kursu, přewažnje w Budyšinje, serbšćinu wuknyli.
Po starobje wobdźělichu so na kursu lětsa ludźi wot 21 do 74 lět. Něhdźe połojca z toho běchu žony. Štyriadwacećo běchu studenća. Wuknyli su w pjeć skupinach – wot započatkarjow hač k daloko pokročenym. Nimo wšědneje wučby su měli 16 přednoškow a poskitkow, w běhu kotrychž su tójšto wo serbskej kulturje, rěči a medijach nawukli. Mjez poskitkami běchu wjacore z aktualneho rjadu „Sorabistika po puću“, kotryž je Serbski institut składnostnje lětušeho jubileja zestajał.
W dwěmaj ekskursijomaj zeznachu Łužicu bliže: W běhu prěnjeje ekskursije zeznachu sewjernu Hornju Łužicu wot Klukša a Lichanja hač do Delnjeho Wujězda, Łaza a Wulkich Ždźarow, hdźež zetkachu so z dalšimi wuknjacymi – Domojnikami. Druha ekskursija wjedźeše wobdźělnikow do katolskeje kónčiny wokoło Chrósćic, hdźež wopytachu Božu mšu, přez Swinjarnju, klóšter a Kukow do Worklec a dale ke Kamjentnemu hatej za Smječkecami.
Při wječornej zabawje z hru, spěwom a reju nawuknychu cyły rjad
serbskich ludowych spěwow a pjeć ludowych rejow. Hotowanje Wojerowskeje serbskeje drasty bě wosebite dožiwjenje. Přidatnje k planowanemu programej zmóžni spisowaćelka a filmowča Grit Lemcyna předstajenje jeje filma „Pola nas rěka wona Hanka“.
„Wuspěch kursa pokaza so mjez druhim tež we tym, zo je so 23 kursistow na pruwowanju za certifikat serbšćiny wobdźěliło. Tuta dotal najwyša ličba wjeseli mje jako nawodu kursa wězo wosebje. Dźakuju so Rěčnemu centrej WITAJ, kotryž prawidłownje na kóncu kursa pruwuje“, praji dr. Fabian Kaulfürst. Pruwowanja wotměwachu so lětsa wot niwowa A1 hač do C1 (po zhromadnym europskim referencnym ramiku GER, Gemeinsamer europäischer Referenzrahmen).
Mała statistika
Mjezynarodny lětni kurs za serbsku rěč a kulturu Serbskeho instituta w Budyšinje ma dołhu tradiciju a wotměła so kóžde druhe lěto. Wot lěta 1967 su cyłkownje 906 zajimcow w lěćnych prózdninach intensiwnje serbšćinu wuknyli. Wjetšina wobdźělnikow přińdźe za akademiskeho, slawistiskeho wobłuka.