Serwis hornjoserbsce.de rozšěrjeny. Rěčne kućiki lěta 2024 nětko na rěčnym portalu přistupne
Njedawno su so woblubowane „rěčne kućiki“ z lěta 2024 na rěčnym portalu hornjoserbsce.de wozjewili. Rěčnokulturne přinoški wudźěłaja rěčespytnicy Serbskeho instituta prěnjotnje za Serbski rozhłós. Wusyłaja so kóždu srjedu rano. W awdiotece serbskeho programa MDR su online, chronologisce rjadowane. Nětko su 41 přinoški z lěta 2024 na rěčnym portalu hornjoserbsce.de tež do centralneho pytanja zapřijate, tak zo wužiwar přinoški spěšnje a jednorje namaka.
Z dohromady 908 kućikami prezentuje Serbski institut nahladnu zběrku rěčnokulturnych přinoškow. Přinoški za Serbski rozhłós wudźěłaja a předstajeja rěčespytnicy dr. Anja Pohončowa, dr. Leńka Šołćic a dr. Jana Šołćina kaž tež něhdyša kolegina dr. Sonja Wölkowa. Zahajił je so rozhłosowy rjad w lěće 2002. „Rěčne kućiki“ su bóle praktiske hač teoretiske rozmyslowanja wo najwšelakorišich prašenjach moderneje hornjoserbšćiny. Na institutnym portalu móže zajimc za konkretnymi přikładami abo temami rešeršować.
Portal hornjoserbsce.de natwarja so wot lěta 2017 a zmóžni jednotny přistup k informaciskim žórłam wo hornjoserbšćinje, kotrež su so w Serbskim instituće nadźěłali abo z jeho wobdźělenjom. Serwis skića zdźěla tež wobšěrne fleksiske tabulki direktnje na městnje – přijomny feature za tych, kiž rěč hakle wuknu abo sej wěsći njejsu, kak prawje skłonjować abo časować. Fleksiske tabulki su zarjadowane za Nowy němsko-hornjoserbski słownik, za wobdźěłane online-wudaće Słownika noweje leksiki a za modul Nowa leksika a maja so postupnje tez na dalše serwisy rozšěrić.
Dale čitać a wuspytać:
- serwis hornjoserbsce.de Serbskeho instituta z centralnym pytanjom
- dalše informacije wo rěčnych kućikow a wo zaměrje přinoškow
- rěčne kućiki w awdiotece MDR
- Němsko-hornjoserbski słownik noweje leksiki w druhim, dospołnje předźěłanym nowonakładźe wušoł (7.2.2025)