Wupisanje městna wědomostneho sobudźěłaćerja / doktoranda (m, ž, d) w rěčespyće (doba požadanja: 17. meje 2024)
We wobłuku DFG-projekta ma so w Serbskim instituće z.t. wot 1. julija 2024 městno wědomostneho sobudźěłaćerja / doktoranda (m, ž, d) w rěčespyće wobsadźić. Jedna so wo městno we wobjimje 65%. Městno je wobmjezowane na tři lěta, mzda płaći so při wotpowědnych wuměnjenjach po TV-L E13.
Dźěłowe městno je wobstatk zhromadneho DFG-projekta “Typen von Herkunftssprachen im Vergleich: Obersorbisch und Polnisch in Deutschland (HOsPoD)” Seminara za slawistiku uniwersity Bochum (prof. dr. Tanja Anstatt) a Serbskeho instituta z. t. (dr. Leńka Šołćic). W tutym projekće přepytuja a přirunuja so sociolinguistiske a rěčnostrukturelne wuwića w mjenowanymaj rěčomaj. Tu wupisane městno ma so z rěčnostrukturelnymi prašenjemi nastupajo hornjoserbšćinu zaběrać.
Nadawki:
Ćežišćo dźěła je zběranje a analyza rěčnych datow k hornjoserbšćinje. Sćěhowace nadawki maja so we wuskej kooperaciji z projektowymaj nawodnicomaj wobdźěłać:
- nadźěłanje testowych materialijow k zběranju rěčnych datow
- zběranje (pólne slědźenja) a přihotowanje rěčnych datow k hornjoserbšćinje
- analyza diachronych datow k hornjoserbšćinje
- analyza hornjoserbskich datow hladajo na kategoriji werbalny aspekt a žiwosć/ muskowosobowosć
- samostatne wědomostne slědźenje k werbalnemu aspektej a žiwosći/ muskowosobowosći w hornjoserbšćinje, napisanje disertacije
- wobdźělenje na wědomostnych konferencach
- sobudźěło na publikacijach
Waš profil:
- master w sorabistice, slawistice abo druhim afinym předmjeće, z linguistiskim ćežišćom
- po móžnosći maćernorěčne znajomosće w jednej hornjoserbskej warjeteće
- jara dobre znajomosće němčiny (C1)
- wotewrjenosć napřećo prašenjam k gramatiskej róli werbalneho aspekta a žiwosće/ muskowosobowosće
- zajim za koncepty slědźenskeju polow rěčneho kontakta a k pochadnym rěčam (heritage languages)
- zwólniwosć k wobšěrnemu zběranju datow (pólne slědźenje)
- kmanosć samostatnje dźěłać, dźěłowe wotběhi organizować kaž tež k dźěłu w teamje
- přejomne: nazhonjenja w samostatnym empiriskim dźěle; dobre znajomosće jendźelšćiny
Serbski institut z. t. jako zwonkauniwersitne slědźenišćo z někak 70 přistajenymi na dwěmaj městnomaj (w Budyšinje a Choćebuzu) slědźi na polu rěče, stawiznow a kultury Serbow w Hornjej kaž tež Delnjej Łužicy w zašłosći a přitomnosći. Integralny wobstatk instituta stej Serbski kulturny archiw a Serbska centralna biblioteka.
Serbski institut poskića dźěło w dynamiskej, wjelestronskej a interdisciplinarnej duchownowědnej slědźenskej wokolinje. Wočakuje so zwólniwosć k dźěłu w serbskorěčnym miljeju. Stajna prezentnosć na dźěłowym městnje w Budyšinje njeje trěbna.
Serbski institut spěchuje powołanske runostajenje žonow a muži a zasadźuje so za zjednoćomnosć powołanja a swójby. Tohodla su žony wosebje namołwjene so powabić. Na wosebite wobkedźbowanje ćežko zbrašenych při jenakej kwalifikaciji so dźiwa.
Swoje pisomne požadanje pósćelće prošu hač do 17. meje ze zwučenymi podłožkami a jenož w digitalnej formje (mejlka z přiwěškom jedneje pdf-dataje) na Serbski institut, si@serbski-institut.de.
Při prašenjach k městnu wobroćće so prošu na dr. Leńku Šołćic (lenka.solcic@serbski-institut.de). – Wjeselimy so na Waše požadanje!
Pokiw k škitej datow: Ze zapodaćom swojeho prócowanja přihłosujeće předźěłanju Wašich wosobinskich datow we wobłuku a k přewjedźenju procesa požadanja. Tute přizwolenje móže so kóždy čas bjez podaća přičin pisomnje abo elektronisce napřećo direktoratej cofnyć. Prošu wobkedźbujće, zo wjedźe cofnjenje přizwolenja k tomu, zo njemóže so Waše požadanje w běžacym požadanskim procesu hižo wobkedźbować.