Wutwar internetoweho portala wo hornjoserbšćinje

2018 wozjewi so analognje k portalej dolnoserbski.de koncipowany internetowy rěčny portal hornjoserbsce.de, wobsahowacy tuchwilu jako zazběh efektiwnje wužiwajomnu onlineprezentaciju „Rěčnych kućikow“ . Hnydomny wutwar strony njebě falowacych kapacitow dla předwidźany. Diskusije wo dalšim wuwiću internetoweje strony soblex.de, kotruž SI sobu njese, wužadachu sej změnu tutoho planowanja. W tym zwisku wuwi so kónc 2018/spočatk 2019 w mjezsobnych rozmołwach (internje, ze Załožbu a z wuwiwarjom strony soblex.de, B. Baierom) zhromadna strategija za dalše wuwiće. Wona předwidźi sukcesiwne přewzaće systema soblex do zamołwitosće SI a jeho perspektiwisku integraciju do strony hornjoserbsce.de. Zaměr je postupne wobohaćenje dotal na soblex přistupnych informacijow wo dalše leksikografiske resursy při wobkedźbowanju etablěrowanych leksikografiskich zasadow.
Jako prěnje ma so Němsko-hornjoserbski słownik (1989/91 = DOW=alt), kotryž je so w projekće Wutwar normatiwneje bazy za hornjoserbsku prawopisnu kontrolu (faza II) za wuhódnoćenje serbskorěčneho materiala retrodigitalizował, podobnje kaž delnjoserbsko-němske słowniki na stronje dolnoserbski.de/ndw w internetowej wersiji wozjewić. To je zdobom wuměnjenje za jeho zwjazanje ze soblex. Jako dalši krok ma so tež „Němsko-hornjoserbski słownik noweje leksiki“ (2006) na tute wašnje k dispoziciji stajić.
Cyły proces dyrbi so při wobmjezowanych kapacitach jako pódlanski projekt organizować, tuž budźe jeho kompletne přesadźenje wěsty čas trjebać.

Nawod projekta: Hauke Bartels, Sonja Wölkowa
Wobdźěłanje projekta: Astrid Schmiedel, Marcin Szczepański, Anja Pohončowa, Jana Šołćina, Thomas Menzel, Měrćin Bałcar
Poradźowanje/podpěra: Wito Bejmak, Bernhard Baier (eksternje)
Wuslědki:
12/2020 DOW 1989/1991-digitalnje ; medijowa zdźělenka
Rozšěrjenja modula "Rěčne kućiki" wo přinoški z předchadźaceho lěta (08/2020: 2019)