Studenća z wuchodneje Europy informuja so wo sorabistiskim slědźenju

Skupina wot něšto wjac hač 30 studowacych z Němskeje, Pólskeje, Čěskeje, Ukrainy a Běłoruskeje wopyta pjatk (9. meje) Serbski institut. Historikar dr. Edmund Pjech sposrědkowa jim wědu wo stawiznach sorabistiski a Serbskeho instituta. Wot dr. Annett Brězanec, wjednicy Serbskeho kulturneho archiwa, zhonichu, kotre pokłady archiw (ze statusom narodneho archiwa) chowa, a kak so serbske kulturne namrěwstwo zapisuje, składuje a spřistupni – a kotru rólu digitalizacija při tym hraje.

Přez Serbsku centralnu biblioteku wjedźeše studentow fachowědomostna referentka Anna Měrćinowa. Wulki zajim pokazachu tež za aktiwity instituta za sorabistiski akademiski dorost, kotryž je so hakle minjeny tydźeń w Serbskim instituće zetkał a za mjezynarodny Lětni kurs za serbsku rěč a kulturu, kotryž institut kóžde druhe lěto poskići.

Skupina zaběraše so na swojej ekskursiji wot 8. do 11. meje wosebje z kulturelnymi a historiskimi aspektami města Budyšina a wokoliny – k tomu słuša tež wuznam Serbow a Serbstwa za region.

Na programje steješe mjez druhim hišće wopyt proby w Serbskim ludowym ansamblu a crashkurs serbšćiny. Studijnu jězbu organizowaše zhromadźenstwo za studentsku wuměnu w srjedźnej a wuchodnej Europje z.t. (GFPS)