30. september, pśednosk: „Mjeńšynowe rěcy rewitalizěrowaś: nowe slěźenje a nowe ideje za nowe powědaŕki a nowych powědarjow“

termin: 30.09.2025 16:00 zeger

Městno zarědowanja: Serbski institut – Regionalne wuwiśe a mjeńšynowy šćit, Pśi Grodowej cerkwi 2, 03046 Chóśebuz

Sociolinguistka dr. Ruth Kircher z Europskego centruma za mjeńšynowe pšašanja (European Centre for Minority Issues, Flensburg) pśednosujo w Chóśebuzu wó wuznamje nowych powědaŕkow a powědarjow za rewitalizaciju mjeńšynowych rěcow. We Łužycy – z „rěcnyma gnězdoma“ ZORJA a DOMOJ – jo to kradu aktualny tema.

Nowe powědaŕki a powědarje (newspeakery) su wósoby, kenž sebje mjeńšynowu rěc w familijowem wobswěśe abo w zgromadnosći njepśiswójuju, ale pśez kubłanje abo wósobinsku motiwaciju nowo nawuknu. Kircher zaběra se w swójom pśednosku ze slědujucymi pšašanjami: Kake su póśěgi mjazy tradicionelnymi a nowymi powědaŕkami a powědarjami, kake wupominanja a šanse wuchadaju z togo za rewitalizaciju wobgrozonych rěcow a kótare pśikłady za best practice na swěśe dajo.

Zjawny pśednosk měri se na wósoby, kótarež zajmuju se za aktualne pśedewześa glědajucy na rewitalizaciju rěcy, za dalejdawanje rěcy a za potencielne perspektiwy dolnoserbskego rěcnego planowanja. Pó pśednosku jo góźba za diskusiju a wuměnu.

Zarědowanje se wótmějo w rěźe „RegMje pśepšosyjo“ wótźělenja za regionalne wuwiśe a mjeńšynowy šćit Serbskego instituta we wobłuku projekta „masterplan za rewitalizaciju dolnoserbskeje rěcy”.

Z organizatoriskich pśicynow pšosymy wó pśizjawjenje až do njeźele, 28. septembra, pód https://sroka-plan.org/de/veranstaltungen/artikel-ruth-kircher.html. Online-wobźělenje jo móžne. Maśo-lic pšašanja, wobrośćo se rad z mejlku (regmje@serbski-institut.de) na team wótźělenja.

Wótźělenja za regionalne wuwiśe a mjeńšynowy šćit a projekt „masterplan za rewitalizaciju dolnoserbskeje rěcy” spěchuju se wót Załožby za serbski lud ze srědkow Zwězkowego ministaŕstwa nutśikownego na zakłaźe wobzamknjenja Nimskego zwězkowego sejma.