Informacije zastojnstwow něnt teke w dolnoserbskej rěcy
Casnikarska informacija Ministaŕstwa justicy a za digitalizaciju w Bramborskej z dnja 4. awgusta 2025
Kraj Bramborska jo jadnu wažnu kšoceń dalej stupił na droze k rownostajenjeju dolnoserbskeje rěcy a k widobnosći serbskego ludu: Wót julija 2025 stoje wuzwólone zastojnske słužby na centralnem serwisowem portalu service.brandenburg.de teke w dolnoserbskej rěcy k dispoziciji.
To źěło wordujo wugbane na zakłaźe kazni wó online-pśistupje (Onlinezugangsgesetz), ako dej digitalny pśistup k zastojnskim słužbam we cełej Nimskej garantěrowaś. Za ten cel wužywa se redakciski system “Bürger- und Unternehmensservice Brandenburg (BUS-BB)”. Ten samy su něnt wó tu móžnosć rozšyrili, až wužywarje mógu wopśimjeśa we dolnoserbskej rěcy wiźeś.
We ramiku wuskeje kooperacije ze Serbskim institutom su wordowali te wopisanja zastojnskich słužbow, za kótarymiž se nejcesćej pšaša, profesionelnje pśestajone. K tomu słušaju mjazy drugim slědujuce:
- spěchowanje cesnoamtskeje źěłabnosći,
- stajenje póžedanja wó pomoc pśi wótwardowanju,
- stajenje póžedanja wó jězdźaŕske wopismo klasow AM, A, A1, A2 abo A,
- pśemjeldowanje zwarbowaŕstwa (zwarbowaŕskeje źěłabnosći).
Pśestajone teksty stajiju se centralnje k dispoziciji, aby teke komunalne zastojnske portale we serbskem sedleńskem rumje mógali je wužywaś a z tym konkretnje k zdźaržanjeju a spěchowanjeju dolnoserbskeje rěcy we digitalnem rumje pśinosowaś.
Statny sekretaŕ za justicu a digitalizěrowanje Ernst Bürger groni: “Z tym źěłom pódšmarnjo Bramborska woplěwanje a spěchowanje serbskeje mjeńšyny – teke na pólu digitalnego zastojnstwa.”
- casnikaŕska informacija na boce ministaŕstwa
- wudopołnjenje (w swójej wěcy): rěcne póraźowanje