26.januar: Rěd zarědowanjow “K powědanju zwólne” – Serbski institut jo pódla

termin: 26.01.2026 18:00 - 20:00 zeger

Městno zarědowanja: COCO – Stadtlabor Commoning Cottbus Burgstraße 21/22 03046 Cottbus/Chóśebuz

K powědanju zwólne – SROKA: Serbsku rěc nowo nadejś

W Dolnej Łužycy nadejźomy serbsku rěc na wjele flakach – na toflach do sedlišća, w tradicijach, w spiwach abo we wšednem dnju někotarych familijow. Cesto pótłusnjomy ju pśipódla. Co pak se stanjo, gaž se jej wědobnje pśiwobrośijoš? Kake tšojeńka, perspektiwy a wobraze pśichoda budu pótom widobne?

Serbski institut a Netzwerk Bürgerregion Lausitz | Lausitzer Perspektiven pśepšosyjotej Was wutšobnje na wósebne wudaśe rěda „Gesprächsbereit“.

W srjejźišću stoj projekt SROKA – jadna do pśichoda pokazujuca metoda k rewitalizaciji serbskeje rěcy w Dolnej Łužycy. Sroka jo ptašk, ako swóju wokolnosć kradu wobglědujo, wěcy zběra a roznosujo. Za myslu togo wobraza źěła ten projekt gromaźe ze towarišnosću na strategiji, aby rěc była zasej wěcej widobna, cesćej k słyšanjeju a aby jeje nałožowanje se naglědało ako ceło normalne.

Ten wjacor buźotej Sophie Rädel (sobuźěłaśeŕka togo projekta) a Saskia Bugajowa (powědaŕka strategiskeje kupki) Wam daś póglědaś do doněntejšnych rezultatow a cotej z Wami do rozgrona pśiś:

Kaku rolu móžo serbska rěc w strukturnej změnje graś?

Kake móžnosći pódpěranja a sobustatkowanja dajo?

Kak by wšedny źeń wuglědał, gaby dolnoserbšćina zasej samorozmějucy źěl Łužyce był?

Wjaselimy se na žywu wuměnu, njerozwězane pšašanja, nowe impulse – a na góźbu, z Wami kusk serbskeje rěcneje kultury wótnowotki wótekšyś. Wušej togo změjośo ten wjacor móžnosć, zgromadnje postowe kórtki pisaś, z kótarymiž móžośo mały serbski póstrow rozpósłaś – pśijaśelkam a pśijaśelam, familiji abo někomu, kótaremuž cośo wjasele napóraś.

Wšykne zajmce su wutšobnje pśepšosone.

Wobźělenje jo dermo.

Dajo piśa a małe pśikuski.

How móžośo se pśizjawiś.

Kontakt: Ina Fettig – fettig@lausitzer-perspektiven.de

Kooperaciske zarědowanje wót Bürgerregion Lausitz | Lausitzer Perspektiven a Serbskego instituta, wótźělenje za regionalne wuwiśe a mjeńšynowy šćit.  

Wótźělenje za regionalne wuwiśe a mjeńšynowy šćit a projekt „masterplan za rewitalizaciju dolnoserbskeje rěcy“ (SROKA) spěchujo Załožba za serbski lud ze srědkow Zwězkowego ministaŕstwa za nutśikowne na zakłaźe wobzamknjenja Nimskego Zwězkowego sejma.