Rěčespyt

Wot lěta 2015 dźěła rěčespytny wotrjad na dwěmaj stejišćomaj w Budyšinje a Choćebuzu. Do toho bě (wot 1992) linguistiska zaběra z woběmaj serbskimaj spisownymaj rěčomaj a z dalšimi warietami serbšćiny rozdźělena na něhdyši Choćebuski wotrjad za delnjoserbske slědźenja a na tehdy w Budyšinje zaměstnjeny rěčespytny wotrjad.

Zachowanje wobeju stejnišćow Serbskeho instituta spěchuje tež dale přeslědźenje delnjoserbšćiny kaž tež hornjoserbšćiny a tohorunja serbskich dialektow. Ćežišća dźěła su dokumentacija rěče, leksikologija a leksikografija kaž tež slědźenja wo bilingualnym přiswojenju rěče. K tomu přińdu systematiski natwar tekstowych korpusow a nadźěłanje dalšich z kompjuterom wužiwajomnych rěčnych resursow, mj. dr. za awtomatisku prawopisnu kontrolu. Tuchwilu dźěła so na př. na předčitanskej funkciji (hłosowej syntezy) za wobě spisownej rěči.
Wróćo zhladujo je slědźerski spektrum wotrjada šěroki a wopřijimaše w dotalnym 21. lětstotku nimo mjenowanych ćežišćow slědźenja w jara wšelakorych dźěłowych wobłukach (słowotwórba, historiska a synchrona morfologija, fonetika a ortoepija, afigacija słowjesow, relatiwne sady, sekundarna predikacija, leksikaliske požčonki, sociolinguistika, frazeologija, studije na polu korpusoweje linguistiki, stawizny rěče, stawizny sorabistiskeje gramatikografije, dialektologija, rěčny kontakt a dalše).

We wobłuku swojich móžnosćow steja sobudźěłaćerjo rěčespytneho wotrjada tež za rěčne poradźowanje k dispoziciji. Rěčnej praksy słuži tež jich sobuskutkowanje w Hornjoserbskej a Delnjoserbskej rěčnej komisiji, kotrejž tworitej jako měrodajnej rěčnokulturnej gremijej kodifikatoriske rozsudy za hornjo- a delnjoserbšćinu.