BTU a SI wobzamknjotej kooperaciju
Zgromadna informacija BTU Chóśebuz – Zły Komorow a Serbskego instituta
Prezidentka Bramborskeje techniskeje uniwersity Chóśebuz – Zły Komorow (BTU) Gesine Grande a direktor Serbskego instituta (SI) Hauke Bartels pódpišotej kooperaciske dogrono.
Pónjeźele, 26. januar 2026, pódpišotej BTU a SI kooperaciske dogrono, aby zgromadne źěło we wucbje a slěźenju kaž teke angažement za region dalej wukšuśiłej. Partnaŕskej instituciji cotej zgromadne projekty k serbskej kulturje a rěcy (sorabistika) za pśichod wuwiwaś a intensiwěrowaś. Pśi tom twaritej na dłujkolětne nazgónjenja.
Prof. Gesine Grande, prezidentka BTU Chóśebuz – Zły Komorow, groni k tomu: „To źinsa wobzamknjone kooperaciske dogrono spórajo našo zgromadne źěło na nowy, institucionalizěrowany niwow. Tak stwórijomy zawězujucy ramik za zgromadnu wucbu a zgromadne slěźenje, za pśewóźowanje kóńcnych źěłow a promocijow, za nowe slěźaŕske śěžyšća a, nic naslědku, za lěpšu widobnosć serbskeje rěcy a kultury na našej uniwersiśe.”
„Łužyca ako stojnišćo wobeju institucijowu pśeměnja se razantnje. Dla togo stej transformacija a kulturne derbstwo jano dwa pśikłada za płodne zgromadne slěźenja. Perspektiwy su cesto kradu hynakše a my pśiźomy doprědka, gaž je zwěžomy – za to buźomy něnt ceło nowy ramik stwóriś”, pódšmarnjo direktor Serbskego instituta prof. dr. Hauke Bartels.
Planowane su zgromadne wucbne zarědowanja k serbskej rěcy a kulturje, pśewóźowanje kóńcnych źěłow a promocijow kaž teke slěźaŕske pśedewześa, wósebnje na pólu mjeńšynow. To zgromadne źěło wopśimjejo teke zmakanja a konference, procowanje wó tśeśe srědki kaž teke wužywanje infrastrukturow, bibliotekow, digitalnych resursow a Serbskego kulturnego archiwa. Teke dolnoserbska rěc dej na campusu a w zjawnosći wěcej widobna byś.
Wobej instituciji glědatej slědk na ceły rěd zgromadnych aktiwitow. Akle w měrcu lěta 2025 stej SI a BTU transdisciplinarny forum k digitalnej kulturje Serbow organizěrowałej. Wušej togo pśednosuju wědomnostniki Serbskego instituta na BTU k serbskim temam, kaž njedawno w zjawnem rědu cytanjow OPEN BTU.
