Nowa publikacija k serbskemu rěcnemu planowanju wózjawjona

Rozpšawa wót konference a tezowa papjera k institucionalizěrowanju rěcnego planowanja

Nowa źěłowa papjera pśiwobrośijo se institucionalizěrowanju rěcnego planowanja. To jo tema, na kótaruž jo se dotychměst we slěźenju jano mało glědało. Awtory a awtorki publikacije pšašaju za strukturami a procesami za efektiwne, kooridiněrujuce rěcne planowanje wobeju serbskeju rěcowu: Kak by wóno musało se organizěrowaś? Kake nazgónjenja z drugich europejskich mjeńšynowych regionow by mógli se na Łužycu pśenjasć?

Ta źěłowa papjera wopśimjejo k prědnemu rezultaty teje we titelu wobspomnjeteje internacionalneje konference w Chóśebuzu, źož su se zejšli zastupniki a zastupnice dwanasćich europejskich mjeńšynowych rěcow. „My se wjaselimy wósebnje dla togo, až teke praktiske nazgónjenja su namakali drogu do togo zešywka. Licba awtorow a awtorkow z prakse jo se na konferency wobźěliła a swóju perspektiwu wědomnostnikam a wědomnostnicam sobu źěliła”, měni dr. Anastasija Kostiučenko-Kessler, sobuawtorka a wědomnostna sobuźěłaśeŕka na Serbskem institutśe.

Prědny raz toś wopśimjejo Sorabistiska źěłowa papjera pśidatnje tezowu papjeru. Wědomnostniki a wědomnostnice Serbskego instituta su ju spisali gromaźe ze Seśu za serbsku rěc a regionalnu identitu (ZARI). Te 25 teze mógu byś wužytne pśi dalejwjeducych diskusijach wokoło institucionalizěrowanja rěcnego planowanja we cełem, wósebnje pak, gaž źo wó wobej serbskej rěcy. Toś na pśikład tezowa papjera raźi, aby pśi rěcnem planowanju glědali na Bramborsku a na Saksku, stakim na kuždy kraj wósebje, abo aby se na wušej rowninje zgromadnje zjadnali na powšykne principy, cile a źěłabne póla (kaž na pśikład digitalizacija, wukubłanje ceptarjow).

Kostiučenko, A., Nowak, M., Běrinkowa, J., Laschewski, L., Rädel, S. (2026). Institutionalisierung von Sprachplanung. Bericht und Thesenpapier zur internationalen Konferenz ‚Language revitalisation planning: structures and processes‘, Cottbus/Chóśebuz, 8.-9. Mai 2025. Budyšyn: Serbski institut. Sorabistiske źěłowe papjery / Zešywk 11, 33 bokow. DOI: 10.59195/2026.1

We rěźe „Sorabistiske źěłowe papjery“ wózjawjuju se źěła a rozpšawy, zwětšego wót projektow Serbskego instituta. To su poziciske abo konceptowe papjery, dokumentacije (na pśikład wót best practices) a pódobne teksty z aktuelnego źěłowego procesa. Zešywki su pśistupne pód licencu open-access a z numerom DOI na publikaciskem serwerje Serbskego instituta Qucosa.