SROKA se zachopijo: Pytaju se cesnoamtske sobuwugótowarje za dolnoserbske rěcne planowanje
Wupisanje na nowem internetowem boce projekta, cas za pśizjawjenje: 1. junij 2025
Nowy internetowy bok projekta SROKA www.sroka-plan.org pśewóźujo wótněnta proces rěcnego planowanja za dolnoserbsku rěc a jo platforma za interaktiwne zjawne wobźělenje.
Mało powědane rěcy ako dolnoserbšćina su wobgrozone w swójom dalejwobstaśu ako wšedna rěc. Aby se namakali drogi, rěc zasej kšuśe zakokuliś we familiji, šuli a lichem casu w Dolnej Łužycy, jo rěcne planowanje notne. (Rowno to jo teke tema mjazynarodneje konference źinsa a witśe w Chóśebuzu.)
Nowy internetowy bok projekta SROKA pśewóźujo wotněnta proces rěcnego planowanja za dolnoserbsku rěc a jo platforma za interaktiwne zjawne wobźělenje. Sroka njejo jano serbske pómjenjenje za ze serbskimi nałogami zwězanego ptaška, ale jo teke we wobyma rěcoma funcioněrujuca skrotconka za Serbsku rewitalizaciju organizěrowaś, koordiněrowaś a analyzěrowaś. Projektowy team w Serbskem instituśe koordiněrujo a analyzěrujo w pśiducych lětach procowanja wó wótžywjenje dolnoserbskeje rěcy.
Strategijowa kupka, wobstojeca z cesnoamtskich, dej w juliju swójo źěło zachopiś a impulse za konkretne cele a jadnotliwe kšace wuwijaś. “Wótžywjenje rěcy móžo se jano raźiś, gaž se naźěłaju kšace tam zgromadnje z aktiwnymi powědarjami a wuknjecymi dolnoserbšćiny. Nowa strategijowa kupka buźo rěcne planowanje pó wopśimjeśu wugótowaś. Naš projektowy team staja za to wědomnostne zakłady k dispoziciji a twóri notne ramikowe wuměnjenja”, zespominajo Měto Nowak, wědomnostny sobuźěłaśeŕ projekta SROKA. “Wjaselimy se, gaž reprezentatiwna kupka gromadu pśiźo a napominamy togodla wšykne zajmce, aby se pśizjawili: Młode a stare, ze wšyknych dolnołužyskich regionow a ze wšakimi znaśami serbšćiny”, wabi druga wědomnostna sobuźěłaśeŕka projekta, Sophie Rädelowa.
Pśizjawjenje jo móžno až do 1. junija 2025 z pomocu formulara na nowem internetowem boce projekta SROKA. Tam namakaśo teke dalšne informacije k planowanemu póstupowanju strategijoweje kupki, kótaraž buźo se wót julija 2025 do decembra 2027 jaden raz we kwartalu na póraźowanje schadowaś.
Kontakt: Měto Nowak, Sophie Rädelowa, wědomnostnej sobuźěłaśerja, wótźělenje regionalne wuwiśe a mjeńšynowy šćit, sroka@serbski-institut.de
W prědnej fazy projekta Masterplan za rewitalizaciju dolnoserbskeje rěcy, kótaryž aktuelnje wótźělenje za regionalne wuwiśe a mjeńšynowy šćit Serbskego instituta wobźěłujo, su se wót julija 2023 nazgónjenja wót doněntejšnych procowanjow wokoło rewitalizacije w serbskem konteksće, ale teke wót pśirownujobnych pśedewześow w europskem wukraju, zběrali a wugódnośili. Na to natwarjecy jo projektowy team naźěłał koncepcionelne pśemyslowanja k strukturje a wótběgoju w juliju se chopjecego wobźěleńskego procesa. Pódla tematiskich źěłaŕnickow na městnje a online-dialoga za registrěrowanje pśeglěda měnjenjow a argumentaciskich mustrow stoj źěło strategijoweje kupki w srjejźišću. Wóna twóri jědro wobźěleńskego procesa a rozsuźijo wó roznych słupach serbskeje strategije rěcnego planowanja.
Projekt se spěchujo wót Załožby za serbski lud pśez srědki Zwězkowego ministaŕstwa za nutśikowne a domownju na zakłaźe wobzamknjenja Zwězkowego sejma.