Wupisanje dweju wědomnostneju sobuźěłaśerjowu na pólu rewitalizacije dolnoserbskeje rěcy (m/ž/d)

Serbski institut pyta k 01.07.2022 za Chóśebuz

dweju wědomnostneju sobuźěłaśerjowu / dwě wědomnostnej sobuźěłaśeŕce na pólu rewitalizacije dolnoserbskeje rěcy (m/ž/d).

To stej połnej a na cas wobgranicowanej źěłowej městnje. Reducěrowanje źěłowego casa na nanejmjenjej 30 góźinow na tyźeń jo pó rozgronjenju móžne.

Wobej městnje stej dla wósebnych wobstojnosćow spěchowanja nejpjerwjej jano na cas do 31.12.2022 wustajonej. Wónej dejtej se pótom we wobjadnosći z pśistajonym/pśistajoneju nejpjerwjej wó 5 lět pódlejšyś. Myto se płaśi za tarifom TV-L (E13), su-li wósobinske kriterije dopołnjone.

Serbski institut jo zwenkauniwersitarna interdisciplinarna slěźaŕska institucija z jadnab 60 pśistajonymi na dwěma městnosćoma (w Budyšynje a Chóśebuzu). Wón slěźi na pólu rěcy, historije a kultury Serbow w Górnej a Dolnej Łužycy we zachadnosći a źinsajšnem casu. Institutoju pśisłušatej ako jogo integralnej źěła Serbski kulturny archiw a Serbska centralna biblioteka.

Tej źěłowej městnje stej zaměstnjonej we wótźělenju “Regionalne wuwiśe a woplěwanje mjeńšynow”, a wónej stej tam pśiźělonej interdisciplinarnej źěłowej kupce “Rewitalizacija a rěcne planowanje górno- a dolnoserbskeje rěcy”.

Wědomnostny cil teje źěłoweje kupki jo pśez swójo samske empiriske slěźenje – we Łužycy kaž teke internacionalnje pśirownujucy – pśipomogaś k internacionalnej wědomnostnej debaśe k rěcnemu planowanju a rewitalizaciji mjeńšynowych rěcow, tak ako empiriski tak teke teoretiski substancielnje.

Waše nadawki:

• pśewóźowanje rěcnych projektow w Bramborskej, spěchowanych z pjenjez za strukturnu změnu (masterplan za dolnoserbsku rěc, imersiski projekt za dorosćone Zorja) a pódpěranje jich cilow pśez swóje slěźenja
• (dalej)wuwijanje swójogo slěźaŕskego profila, na pśikład k jadnomu ze slědujucych śěžyšćow:
  – bilingualna rěcna praksa a dolnoserbske rěcne zgromaźeństwo
  – rěcne planowanje, bazěrujucy na „community”
  – nowe metody wuknjenja rěcy za wšykne starstwowe kupki
  – analyza institucijow kubłańskego systema a rěcnego planowanja
  – zwenkašulske wuknjenje a městna wuknjenja zwenka familije a šule
  – wužywanje medijow a wuknjenje rěcy – wót knigłow až k wirtuelnym zgromaźeństwam
  – ewaluacija rěcnopolitiskich srědnosćow/projektow; monitoring kubłanja
  – pšawniske a politiske aspekty rěcnego planowanja
• Wobźělenje na nacionalnych a internacionalnych konferencach

Waš profil:

• wótzamknjony wusokošulski studium (master) we jadnom ze slědujucych abo jim pódobnych fachow: sorabistika, slawistika abo druge rěcne wědomnosći, kubłaŕske wědomnosći ze specializaciju na pólu didaktiki a/abo rěcnego planowanja, sociolinguistika, empiriske kulturne wědomnosći, etnologija abo socialne wědomnosći, politiske, juristiske abo zastojnske wědomnosći
• zwólnosć k aktiwnej a intensiwnej interakciji z lokalnymi akterami z ciwilneje towarišnosći a politiki kaž teke zwólnosć k terenowym slěźenjam
• wjelgin dobre znaśe engelskeje a nimskeje rěcy we powědanju a pisanju
• znaśe górno- abo dolnoserbskeje rěcy jo wužytne, njejo pak obligatoriski kriterium za pśistajenje
• zwólnosć k nawuknjenju resp. pódłymjenju znaśow serbskeje rěcy jo kšuty kriterium, ako musy byś dopołnjony
• zwólnosć k dalejkubłanju
• samostatna źěłabnosć, komunikaciska kompetenca a pśemóžnosć źěła we teamje
• zwólnosć k drogowanju (jězdźaŕska dowólnosć klase B1 jo póžedana)

My Wam bitujomy:

• inowatiwnu, kooperatiwnu a fleksibelnu źěłowu a slěźaŕsku wokolinu
• móžnosć internacionalnego pśirownujucego slěźenja
• móžnosć w ramiku dłujkocasowego pśedewześa swój samski wědomnostny profil wuwiś
• we wjelgickano zajmnych praktiskich projektach z wusoko motiwěrowanymi partnarjami a partnaŕkami na pólu prakse gromaźe źěłaś
• móžnosć, až pśez nawuknjenje/nałožowanje dolnoserbskeje rěcy we projektowem teamje wordujośo sami źěł rewitalizaciskego projekta
• kwalifikaciske projekty we zgromadnem źěle z partnaŕskimi uniwersitarnymi institucijami su kradu witane a se pódpěraju

Wjaselimy se južo na Wašo procowanje!

Serbski institut spěchujo rownostajenje žeńskich a muskich we pówołanju a angažěrujo se za to, aby familijowe žywjenje dało se z pówołanim zwězaś. Togodla nagranjamy wósebnje žeńske, aby se wó tej źěłowej městnje procowali. Teke glědamy na to, aby śěžko zbrašonym pśi jadnakej gódnosći k źěłu dali prědnosć.

Pšosbu wó pśistajenje pósćelśo nanejpózdźej do 15.05.2022 gromaźe z pśisłušnymi pódłožkami jano w digitalnej formje (pśez e-mail w pdf-formaśe) na direktorat Serbskego instituta na adresu si@serbski-institut.de. Pšosby, kótarež dojdu k nam pózdźej, budu móc se zapśimjeś, ale jano gaž to źěłowe městno njebuźo hyšći wobsajźone. Pśistajenje stanjo se pó zwólenju projekta pśez pjenjezedawarje.

Pokazk k woplěwanju datow: Zrownju z pśepósłanim pšosby wó pśistajenje pśiwdajośo nam pšawo, aby Waše wósobinske daty w ramiku pśistajeńskeje procedury pśeźěłali. Toś to zwólenje móžośo kuždy cas a mimo pomjenjenja zawinow napśeśiwo direktoratoju pisnje abo elektroniski anulěrowaś. Wobmysliśo pak, až slědkweześe togo zwólenja buźo k tomu wjasć, až njebuźomy móc na Wašo procowanje w běgu aktualneje procedury wěcej glědaś.