Wupisanje: Projektowy manager (ž/m/d)

Serbski institut pyta k nejblišemu terminoju za Chóśebuz (wobgranicowane do 31.12.2031) projektowego managera / projektowu managerku (ž/m/d), 40 góź./tyźeń za wótźělenje „Regionalne wuwiśe a mjeńšynowy šćit“. Pó wótgłosowanju móžo se źěłowy cas na minimalnje 30h/tyźeń reducěrowaś. Myto se płaśi za tarifom TV-L (E9), su-li wósobinske kriteriumy dopołnjone.

Serbski institut jo zwenkauniwersitarna interdisciplinarna slěźaŕska institucija z jadnab 70 pśistajonymi na dwěma městnosćoma (w Budyšynje a Chóśebuzu). Wón slěźi na pólu rěcy, historije a kultury Serbow w Górnej a Dolnej Łužycy w zachadnosći a źinsajšnem casu. Institutoju pśisłušatej ako jogo integralnej źěła Serbski kulturny archiw a Serbska centralna biblioteka.

Wótźělenje za regionalne wuwiśe a mjeńšynowy šćit jo jadno z tśich pśedewześow, ako se pśez źaseś lět (2022 do 2031) ze srědkow Zwězka pśi Serbskem instituśe financěruju we wobłuku spěchowańskego programa kraja Bramborska „Serbska rěc a kultura w strukturnej změnje“. Wótźělenje tematizěrujo serbske žywjenje z póśěgom na pśibytnosć w procesu towarišnostnych změnow. Wóno pśepytujo wustatkowanje tych změnow na serbsku mjeńšynu, pśewóźujo a pódpěrujo serbske strategije za pśiměrjenje. Źěło wótźělenja póśěgujo se stakim na politiku a jadnanje. Wóno ma tśi póla źěła: rěcna rewitalizacija, walorezacija kultury, analyza politiki. Wóno źěła wusko ze wšyknymi wažnymi zajmowymi kupkami a lokalnymi akterami gromaźe. Wažny wobstatk jogo źěła jo mimo togo systematiske a wobšyrne, mjazynarodnje pśirownujuce mjeńšynowe slěźenje.

(Dalšne informacije pód https://www.serbski-institut.de/ns/slezenje/regionalentwicklung-und-minderheitenschutz/)

Nadawki:

• pódpěranje wjednika wótźělenja glědajucy na organizatoriske a administratiwne nadawki (planowanje a zastojanje budgeta, kontrola dojśpiśa celow, rozpšawnistwo)
• pódpěranje sobuźěłaśeŕkow pśi jich slěźenjach
• pódpěranje centralnego zastojanja w Budyšinje
• pódpěranje referentki za wědomnostnu komunikaciju a zjawnostne źěło
• organizacija zarědowanjow
• sekretariat

Pominanja:

• wótzamknjony bachelorowy studium w studijnem směrje, ako zwisujo z managementom, abo wótzamknjone wukubłanje w projektowem managemenśe abo nazgónjenja w pówołanju, ako daju se pśirownaś (na pś. w kulturnem managemenśe, controllingu abo w zastojnstwje)
• znaśa metodow projektowego managementa
• zwólnosć za aktiwne a intensiwne interagěrowanje z lokalnymi akterami (serbskeje ciwilneje towarišnosći, statnych a njestatnych kubłańskich institucijow, regionalneje a komunalneje politiki atd.)
• nazgónjenja na pólu zjawnostne źěło su na wužytk
• wustne a pisne znaśa engelskeje rěcy (nanejmjenjej B2)
• znaśa serbšćiny su na wužytk
• zwólnosć k nawuknjenju resp. pódłymjenju znaśow dolnoserbskeje rěcy jo kšuty kriterium, ako musy byś dopołnjony
• zwólnosć se dalej kubłaś w relewantnych wobceŕkach (na pś. certificěrowanja w projektowem managemenśe, treningi komunikacije)
• samostatna źěłabnosć, komunikaciska kompetenca a zamóžnosć źěła we teamje
• zwólnosć k drogowanju (jězdźaŕska dowólnosć klase B1 jo póžedana)

My Wam póbitujomy:

• wótwěnjate źěłowe městno, źož móžośo swóje ideje zapśimjeś a sebje procese indiwiduelnje a fleksibelnje zarědowaś
• źěłanje we wusoko motiwěrowanem projektowem teamje a zgromadne źěło z angažěrowanymi partnaŕkami a partnarjami w praksy w zajmnych praksisowych pśedewześach

Městno se góźi teke za pówołańskich zachopjeńkarjow a wótnabocnikow.

Wjaselimy se na Wašo procowanje!

Serbski institut spěchujo rownostajenje žeńskich a muskich we pówołanju a angažěrujo se za to, aby se dało familijowe žywjenje z pówołanim zwězaś. Togodla nagranjamy wósebnje žeńske, aby se wó to źěłowe městno procowali. Glědamy na to, aby śěžko zbrašonym pśi jadnakej gódnosći k źěłu dali prědnosć.

Pšosbu wó pśistajenje pósćelśo nanejpózdźej do 31.03.2026 gromaźe z pśisłušnymi pódłožkami jano w digitalnej formje (pśez e-mail w pdf-formaśe) na sekretariat Serbskego instituta na adresu si@serbski-institut.de.

Pokaz na šćit datow: Zrownju z pśipósłanim pšosby wó źěło pśiwdajośo nam pšawo, aby Waše wósobinske daty w ramiku pśistajeńskeje procedury pśeźěłali. Toś to zwólenje móžośo kuždy cas a mimo pomjenjenja pśicynow napśeśiwo direktoratoju pisnje abo elektroniski slědk weześ. Wobmysliśo pak, až slědkweześe togo zwólenja buźo k tomu wjasć, až njebuźomy móc na Wašo procowanje w běgu aktualneje procedury wěcej glědaś.

Projekt spěchujo Załožba za serbski lud ze srědkow Zwězkowego ministaŕstwa za nutśikowne na zakłaźe wobzamknjenja Nimskego Zwězkowego sejma.