Wupisanje: wědomnostny:a sobuźěłaśeŕ:ka (ž/m/d) we wobłuku kulturny marketing
Serbski institut pyta k nejblišemu terminoju za Chóśebuz wědomnostnego sobuźěłaśerja / wědomnostnu sobuźěłaśeŕku (ž/m/d) we wobłuku kulturny marketing. Jadna se wó pó casu wobgranicowane źělne městno. Źěłowy cas wopśimjejo nejpjerwjej 20 góźinow/tyźeń. Jo wótglědane, až se městno pózdźej rozšyrijo. Městno jo nejpjerwjej wobgranicowane až do 31.12.2027. Myto se płaśi za tarifom TV-L (E13), su-li wósobinske kriteriumy dopołnjone.
Serbski institut jo zwenkauniwersitarna interdisciplinarna slěźaŕska institucija z jadnab 70 pśistajonymi na dwěma městnosćoma (w Budyšynje a Chóśebuzu). Wón slěźi na pólu rěcy, historije a kultury Serbow w Górnej a Dolnej Łužycy w zachadnosći a źinsajšnem casu. Institutoju pśisłušatej ako jogo integralnej źěła Serbski kulturny archiw a Serbska centralna biblioteka.
We wobłuku wótźělenja „Regionalne wuwiśe a mjeńšynowy šćit“ jo městno pśirědowane interdisciplinarnej źěłowej kupce „Walorizacija kultury“. Sobuźěłaśeŕ:ka dej se how wósebnje z pšašanim samozastojanego, gromadnego (kulturnego) marketinga Serbow wědomnostnje rozestajaś a za to – w dialogu z partnarjami z prakse – koncepty naźěłaś a je realizěrowaś.
Nadawki
- naźěłaś staw slěźenja a „nejlěpšych praktikow“ (zgromadnego) marketinga (mjeńšynoweje) kultury, wósebnje glědajucy na formy organizacije a marketingowych napšawow
- identificěrowaś celowe kupki za serbski kulturny marketing
- w kooperaciji z praksisowymi partnarjami wuźěłaś koncepciju za zgromadny serbski kulturny marketing a ewentuelnje sobu źěłaś na jeje zwopšawdnjenju
- sobu statkowaś pśi pśewóźowanju pśedewześa „walorizacija imaterielnego kulturnego derbstwa w nimsko-słowjańskem konteksće“, kótarež se spěchujo z pjenjezymi za strukturnu změnu
- organizěrowaś a pśewjasć transferowe a dialogowe zarědowanja
- sobu statkowaś pśi napóranju regionalnych a mjazynarodnych seśow wótźělenja
- wobźěliś se na wědomnostnych zejźenjach w tu- a wukraju
- sobu statkowaś pśi powšyknych nadawkach/zarědowanjach wótźělenja a instituta
Pominanja
- wótzamknjony wusokošulski studium (master) w jadnom z pśiducych abo pśiswójźbnych pśedmjatow: kulturny management, (kulturny/regionalny) marketing, wucba wó zawodowem góspodaŕstwje, kulturne abo socialne góspodaŕstwo, kulturne wědomnosći, management kulturnego derbstwa
- wjelgin dobre znajobnosći nimskeje rěcy w słowje a pismje a wěste komunikaciske znajobnosći engelskeje rěcy
- znaśa jadneje ze serbskeje rěcowu su lěpšyna, njejsu pak wuměnjenje za pśistajenje, wócakujo pak se zwólnosć, serbsku rěc nawuknuś resp. wótpowědne znajobnosći pódłymiś
- wěste wobchadanje z relewantneju software (na pś. office, digitalne toole za marketing) jo k lěpšemu
- praktiske/pówołańske nazgónjenja w kulturnem abo regionalnem marketingu su k lěpšemu
- zwólnosć se dalej kubłaś
- samostatna wašnja źěła, komunikaciska kompetenca a zamóžnosć w teamje źěłaś
- zwólnosć za drogowanje
Póbitujomy Wam:
- inowatiwnu, kooperatiwnu a fleksibelnu źěłowu a slěźeńsku wokolinu
- móžnosć, mjazynarodnje pśirownujucy a rownocasnje praksy blisko slěźiś
- až móžośo w dlěj trajucem pśedewześu swój wědomnostny profil rozwijaś
- až móžośo w zapśimujucych praktiskich pśedewześach z wusoko motiwěrowanymi a angažěrowanymi partnarjami gromaźe źěłaś
- až móžośo pśez wuknjenje/nałožowanje dolnoserbšćiny w projektowem teamje źěł rewitalizaciskego projekta za dolnoserbšćinu byś
Wjaselimy se na Wašo procowanje!
Serbski institut spěchujo rownostajenje žeńskich a muskich we pówołanju a angažěrujo se za to, aby se dało familijowe žywjenje z pówołanim zwězaś. Togodla nagranjamy wósebnje žeńske, aby se wó to źěłowe městno procowali. Glědamy na to, aby śěžko zbrašonym pśi jadnakej gódnosći k źěłu dali prědnosć.
Pšosbu wó pśistajenje pósćelśo nanejpózdźej do 15.05.2024 gromaźe z pśisłušnymi pódłožkami jano w digitalnej formje (pśez e-mail w pdf-formaśe) na direktorat Serbskego instituta na adresu si@serbski-institut.de. Teke pózdźej pśichadajuce procowanja mógu se zapśimowaś, jolic jo městno hyšći wótwórjone.
Pokaz na šćit datow: Zrownju z pśipósłanim pšosby wó źěło pśiwdajośo nam pšawo, aby Waše wósobinske daty w ramiku pśistajeńskeje procedury pśeźěłali. Toś to zwólenje móžośo kuždy cas a mimo pomjenjenja pśicynow napśeśiwo direktoratoju pisnje abo elektroniski slědk weześ. Wobmysliśo pak, až slědkweześe togo zwólenja buźo k tomu wjasć, až njebuźomy móc na Wašo procowanje w běgu aktualneje procedury wěcej glědaś.
Wótźělenje za regionalne wuwiśe a mjeńšynowy šćit jo pśedewześe, kótarež se na Serbskem instituśe spěchujo z pjenjezami Zwězka we ramiku spěchowańskego programa „Serbska rěc a kultura we casu strukturnego pśeměnjenja” wót kraja Bramborska.