Podiumowe rozgrono k filmoju “Žałosći nam Łužyca” (1990)

Hyšći až do 24.03.2024 jo Wjaža bramborsko-pšuskeje historije prezentěrowała fotografije Christiny Glanz z łužyskich wuglowych jamow. We pśewóźujucem programje jo se na 22. februarje prezentěrował dokumentarny film “Die Schmerzen der Lausitz / Žałosći nam Łužyca” (1990). Z tym filmom jo Pětš Rocha dokóńcował swóju “Łužysku trilogiju”. Wón pokazujo we gnujucych wobrazach a z wjeliku sensibilitu napśeśiwo serbskim aspektam žywjenje pśi wuglowej jamje, ale teke žywjenje wót wugla a z wuglom. Pósporomje spiwarja Gerharda Gundermanna a planarja krajiny Otto Rindta powěda teke pisaŕ Jurij Koch a Heinjak Strittmatter (Erwina Strittmattera bratš) we filmje.

Pó filmje jo se pśewjadła podiumowa diskusija dla wucynkow wuglowego górnistwa na kulturu a wobswět Łužyce a wósebnje na Serby. Systematiske pśeslěźenje wucynkow górnistwa na serbsku kulturu jo – pódla pśewóźowanja aktuelneje iniciatiwy k pśipóznaśu górnistwoweje krajiny ako swětowe derbstwo – wažne pólo slěźenja na Serbskem instituśe. Prědne dopóznaśa k rozestajenjam z mjeńšynowymi a ludnosćowymi pšawami jo sobuźěłaśeŕka dr. Jenny Hagemann zapśěgnuła do diskusije z Danielom Kubikom (Serbsko-nimska filmowa seś Łužyca) a Renejom Šusterom (Zelena liga Chóśebuz).

Rozpšawa: Jenny Hagemann, wědomnostna sobuźěłaśeŕka we wótźělenju za regionalne wuwiśe a šćit mjeńšynow