28. oktobra, pśednosk a diskusija wó wuwiśu serbskeje rěcy a kultury w strukturnej změnje w Bramborskej

termin: 28.10.2025 11:00 zeger

Městno zarědowanja: Serbski institut – Regionalne wuwiśe a mjeńšynowy šćit, Pśi Grodowej cerkwi 2, 03046 Chóśebuz

Pśedstajenje studije wó wuwiśu serbskeje rěcy a kultury w Dolnej Łužycy z wósebnym fokusom na aktualne projekty strukturneje změny

referent: Daniel Häfner, jadnaŕ Plon GmbH – Łužyski institut za strategiske póraźowanje

W zgromadnem źěle z dr. Carstenom Schürmannom spisanu studija wopśimjejo daty mj. dr. z wobłukow politiske wobźělenje, wukubłanje rěcy, wužywanje medijow abo wuwiśa aktualnych projektow strukturneje změny, ako na pśikład projekt za walorizaciju serbskego kulturnego derbstwa. Zběrane daty su teke móžny referencny dypk za wóspjetowańske studije.

Pśedstajona studija bazěrujo na indikatorskem systemje za serbsku strukturnu změnu, kótaryž jo Häfner zgromadnje z dr. Carstenom Schürmannom 2024 spisał (zešywk 7 rěda “Sorabistiske źěłowe papjery” Serbskego instituta). Prědna zběrka datow jo se wuźěłała, aby ten indikatorowy system pśekontrolěrował a wuproběrował, lěc se góźi za dłujkodobny monitoring serbskeje kultury a rěcy w Dolnej Łužycy.

Daniel Häfner jo jadnaŕ jadnaŕ Plon GmbH – Łužyski institut za strategiske póraźowanje a spěchujo aktualnje wósebnje serbske kulturne a kreatiwne góspodaŕstwo. Dr. Carsten Schürmann jo wobsejźaŕ „Büro für Raumforschung, Raumplanung und Geoinformation (RRG)” a njewótwisny póraźowaŕ z fokusom na kwantitatiwne indikatiwne indikatory bazěrowane analyze a wuwijanje planowańskich instrumentow, indikatorowych systemow a monitoringowych instrumentow.

Zarědowanje měri se na nosaŕki a nosarjow politiskich rozsuźenjow, sobuźěłaśeŕki a sobuźěłaśerjow zastojnstwa, politiski angažěrowanych a na wšych, kenž zajmuju se za pšašanja politiskego wóźenja w konteksće mjeńšynoweje politiki.

Z organizatoriskich pśicynow pśizjawjenje jo notne až do pětka, 24. oktobra pód regmje@serbski-institut.de. Online-wobźělenje jo móžno. Link za to dostanjośo pó pśizjawjenju.

Maśo-lic pšašanja, wobrośćo se rad z mejlku (regmje@serbski-institut.de) na team wótźělenja.

Zarědowanje w rěźe „RegMje pśepšosyjo“ wótźělenja za regionalne wuwiśe a mjeńšynowy šćit Serbskego instituta.

Projekt spěchujo Załožba za serbski lud ze srědkow Zwězkowego ministaŕstwa za nutśikowne na zakłaźe wobzamknjenja Nimskego Zwězkowego sejma.