Žywe kulturne derbstwo we fokusu – nowa publikacija we Małem rědu Serbskego instituta

Z nowymi knigłami „Kulturna diwersita a imaterielne kulturne derbstwo – slěźenje, póraźowanje a praksa we dialogu“ (originalny nimski titel: „Kulturelle Diversität und Immaterielles Kulturerbe – Forschung, Beratung und Praxis im Dialog“) jo Serbski institut wudał dalšny zwězk (numer 41) swójogo Małego rěda. Ta licho pśistupna publikacija (open access) tematizěrujo we źewjeśich artikelach a jadnom foto-eseju wšakorakosć a dynamiku prakticěrowaneje kultury.

Pód žywym kulturnym derbstwom njerozměju te awtory jano zdźaržanje tradicijow, ale strategisku inwesticiju do pśichoda. We srjejźi stoj UNESCO-wujadnanje z lěta 2003 k zdźaržanju imaterielnego kulturnego derbstwa a pšašanje, kake wucynki ma to same na towarišnosć. Wjelerakosć kultury se pokažo, źož towarišnosći se za tradicije staraju, na pśikład za typiske reje, muziku, swěźenje, rucnikaŕstwo abo wulicowanje bajkow, a je na pśiduce generacije dalej dawaju, ale teke źož z togo nowe ideje wurostu.

Zakład teje publikacije jo była fachowa konferenca „Kulturna diwersita w slěźeńskej a póraźowańskej praksy k imaterielnemu kulturnemu derbstwu“ we oktoberje 2024 we Chóśebuzu. We tych pśinoskach jo rozkłaźone, dla cogo jo trjeba, aby kultury mjeńšynow wordowali we nadregionalnem diskursu wěcej widobne, a kak móžomy luźe za nastupnosći tych doněta pódreprezentěrowanych kupkow sensibilizěrowaś – na pśikład we měsćańskem abo migrantiskem konteksće. Za wótglědanim wudawarjow njepśidu te pśinoski jano wót slěźarjow, ale teke wót partnarjow z prakse a wuměłcow.

Pósporomje tych konferencowych nastawkow wopśimjejo ten zwězk jaden tekst k pšašanju, kaku rolu to UNESCO-wujadnanje za serbske kulturne derbstwo grajo, a foto-esej Andreasa Batkego, ako wopisujo pśeměnjenje wšedneje kultury z carnoběłymi fotografijami.

Ta publikacija jo źěł projekta Praktiki imaterielnego kulturnego derbstwa w Dolnej Łužycy, kótaryž słuša ku głownemu pśedewześu Digitalny portal k serbskim a łužyskim rěcnym a kulturnym krajinam. Ten projekt spěchujo Załožba za serbski lud z pjenjezymi Zwězkowego ministaŕstwa za nutśikowne nastupnosći na zakłaźe wobzamknjenja Nimskego Zwězkowego sejma.

Pśedstajenje knigłow na 24. juniju we Chóśebuzu:

Dalej cytaś:

• DOI knigłow (open access): 10.59195/2026.6
• Žywe kulturne derbstwo w Dolnej Łužycy na informaciskem portalu SORABICON