Rozdźěle a pśisłušnosć: Indigene a awtochtone narodne mjeńšyny w se měnjajucych regionach Europy

Wěcej ako 100 milionow luźi w Europje pśisłuša pó charśe FUEN jadnomu z wěcej ako 300 narodnych mjeńšynow. Toś te zgromaźeństwa – definěrowane pśez awtochtoniju abo indigenosć ako pla Sami – su cesto w nabocnych wejsnych a pśigranicnych stronach žywe. Jich sedleński rum njejo pśi tom jano historiski zrosćony kulturny a rěcny rum, ale teke socioekonomiski žywjeński zakład. W nowembrje 2025 jo tematizěrował Serbski institut w kooperaciji z Leibnizowym institutom za krajnowědu (IfL) Lipsk a z BTU Chóśebuz-Zły Komorow toś te mjazsobne statkowanja na mjazynarodnej konferency w Lipsku. W srjejźišću su stojali póśěgi mjazy kulturnymi, politiskimi ako teke ekonomiskimi transformaciskimi procesami w europejskich mjeńšynowych regionach a jich wugbaśa na pśichod toś tych zgromaźeństwow.

Zaměr projekta jo wudawanje wubranych konferencnych pśinoskow w interdisciplinarnem wósebnem zešywku casopisa „Lětopis – Casopis za sorabistiku a pśirownujuce mjeńšynowe slěźenje“. Publikacija realizěrujo se we wuskem zgromadnem źěle z dr. Frankom Meyerom (IfL) a prof. dr. Ludgerom Gailingom (BTU Chóśebuz-Zły Komorow).