17. septembra: Konferenca “Urbane a regionalne planowanje, governance mjeńšynow a serbska kultura”

termin: 17.09.2026 09:00 - 13:00 zeger

Městno zarědowanja: BTU Chóśebuz–Zły Komorow, campus w Chóśebuzu, ateljej Oestreich w wucbnej wjažy 2C/D, 1. nastwaŕk, Aleja Konrada Wachsmanna 8, 03046 Chóśebuz (plan campusa)  

Wuchadnišćo a cil konferency

Kak rěc z pomocu wobtwarjenskego plana (Bebauungsplan) šćitaś? Co ma strukturna změna Łužycy ze serbskeju rěcu cyniś? Na prědne póglědnjenje mógła se taka kombinacija regionalnego a urbanego planowanja z mjeńšynoweju politiku źiwna zdaś – jo, pśisamem kuriozna. A weto: To pšašanje, kak kultura mjeńšyny móžo se zdźaržaś a dalej dawaś, jo wusko spleśone z infrastrukturu, wuwiśim (wobydlonego) ruma a z planowanim.

Wuchadnišćo konferency jo jadna źěłowa hypoteza: we nimsko-serbskem konteksće felujo dotychměst do dalokeje měry mjeńšynowa governance. Wóna musy se nejpjerwjej wuwiś. To njamóžo se raźiś jano z pomocu klasiskich instrumentow mjeńšynoweje politiki (spěchowanje rěcy, kubłanje a financěrowanje kultury). Pśeto rowno tak deje se do togo strategiskego procesa zapśěgnuś komuny, ako stajaju wažnu infrastrukturu k dispoziciji, a planowanje ruma. Jich potencial se dotychměst lěbda wužywa. Pśi tom maju cile we konkretnych planaŕskich dokumentach bejnje wažnu praktisku relewancu za šćit mjeńšynow.

Diskutěrowane wordujo, kak njematerielna kultura – a k tomu słuša rěc – jo dotychměst do procesow planowanja zapśěgnjona resp. kak móžo se do nich we pśichoźe zapśěgnuś. Teke zwenka serbskego konteksta wótwóriju se pśistym nowe koncepcionelne drogi, jolic až rozmějomy (mjeńšynowu) kulturu ako prakticěrowane kolektiwne wěźenje a governance ako problem managmenta wěźenja. Na konferency se pomjeniju metodiske wupominanja teje hyšći młodeje slěźaŕskeje discipliny a se pśedstaji prědne empiriske dopóznaśa.

Konferenca jo myslona za wědomnostniki a wědomnostnice rowno tak ako za aktery a akterki z planowanja ruma, regionalneje politiki a mjeńšynowych organizacijow.

Organizator konference jo Serbski institut, wótźělenje za regionalne wuwiśe a mjeńšynowy šćit we kooperaciji z
fakultu architektury, twaŕskego inženjerstwa a urbanego planowanja BTU Chóśebuz–Zły Komorow.

Pśigranjański partnaŕ jo Dr. Lutz Laschewski.

Program konferency:

Pśiźenje (9:00–9:30)

Zakłady (9:30-10:20)

• Lutz Laschewski, wjednik wótźelenja za regionalne wuwiśe a mjeńšynowy šćit (Serbski
  institut): Regionalplanung und Minderheitengovernance – Zur Herleitung der Fragestellung
• Ludger Gailing, profesor za regionalne planowanje (BTU): Governance-Formen,
  Institutionen und Anerkennungsgerechtigkeit als konzeptioneller Rahmen

Pawza (10:20-10:30)

Pšawo a instrumenty (10:30-11:20)

• Bernhard Weyrauch, profesor za twaŕske pšawo a pšawo planowanja (BTU): Kulturelle
  Belange nationaler Minderheiten im Umwelt- und Planungsrecht – Rechtliche
  Grundlagen, Instrumente und Entwicklungsperspektiven
• Jenny Hagemann, wědomnostna sobuźěłaśeŕka Serbskego instituta:
  Kulturverträglichkeitsanalyse – Ansatz und erste Erfahrungen

Pawza (11:20-11:30)

Wěźenje a njewěźenje we planowanju (11:30–13:00)

• Hanka Renšojc, wědomnostna sobuźěłaśeŕka Serbskego instituta: Die
  Thematisierung von Sorben/Wenden in touristischen Entwicklungskonzepten der
  Lausitz – eine Bestandsaufnahme
• Měto Nowak, wědomnostny sobuźěłaśeŕ Serbskego instituta: Sorbische Sprache(npolitik)
  in kommunalen Entwicklungskonzepten
• Richard Pantzier, wědomnostny sobuźěłaśeŕ regionalnego planowanja (BTU) a Daniel Häfner, PLON GmbH: Kafej & rozgrono k módrośišćoju