KULTURNE WĚDOMNOSĆI (Budyšyn/Chóśebuz)

Z 1. januarom 2014 stej se zjadnośiłej wótźěleni „Kulturne a socialne stawizny“ a „Empiriske kulturne slěźenje/ludowěda“, załožyło jo se nowe „Wótźělenje kulturne wědomnosći“. Cel wótźělenja jo wobšyrne, transdisciplinarne pśeslěźowanje stawiznow a pśibytnosći serbskeje mjeńšyny w Górnej a Dolnej Łužycy – w kompleksnem spleśenju z wětšynu, kaž teke z drugimi kulturami a kulturelnymi procesami. Dalšny cel jo pśirownujuce mjeńšynowe slěźenje w europskem konteksće.

Wažny tematiski wobłuk historiskego resp. historiografiskego slěźenja twórje tuchylu na aktery a wósoby wusměrjone temy kaž teke slěźenja wó towarišnostnych strukturach a politiskich resp. kulturelnych institucijach, ako su to šula, cerkwja, medije. Elementy spominańskeje kultury, specielnje we wobłuku twórjecych wuměłstwow a generelnje wobraznitosći su za wótźělenje trajnje zajmne. Wšykne te slěźenja dotykuju se na wěcej městnach pšašanjow kulturnego slěźenja, tak až eksistěrujo wjeliki potencial za interdisciplinarnu kooperaciju – potencial, kenž dej se skóro intensiwnjej a zaměrnjej wupóceraś. Spektrum temow kulturnego slěźenja jo šyroko wótcerjony: identita, etnicita, pśedsudki a stereotypy, narodne drastwy, nałogi, religioznosć, familija, pśesedlarje, rum a (wob)swět žywjenja, kultury wulicowanja, pśisłowa, wobraze wó Serbach, nowe medije. Mjazdrugim źo wó pšašanja kulturneje diference, wó konstrukcije swójskosći, wó strategije wobchadanja z cuzym, wó kubłanje, interkulturelnu a interetnisku komunikaciju. Pśi tom fokusěrujo slěźenje wuraznje transkulturelne resp. interkulturelne fenomeny: Dwójorěcnosć a wěcejkulturalnosć, stawizny póśěgow mjeńšyny a wětšyny, etniske konflikty a dialogiske zmakanja w historiskej a aktualnej perspektiwje, wobchadanje z diwersitu a hynakšosću.