Nimski źeń slawistiki – Serbski institut pódla, prědny raz z panelom k dolnoserbskej rěcy
Dogromady ze sedym pśednoskami buźo Serbski institut (SI) wót 30. septembera do 3. oktobera na 15. Nimskem dnju slawistiki na Schillerowej uniwersiśe w Jenje zastupjony. K prědnemu razu wón se wobźělijo ze swójim samskim sociolinguistiskim panelom k dolnoserbskej rěcy. Źeń slawistiki jo nejwětšy slawistiski kongres w Nimskej a nejwažnjejšy forum wědomnostnego diskursa wót rěcow, literaturow a kulturow słowjańskich ludow.
Ten sociolinguistiski panel, ako SI organizěrujo, ma titel „Niedersorbisch im Aufbruch: Chancen und Perspektiven für die Zukunft”. Te referenty Julija Běrinkowa, Evan Bleakly, Šyman Blum, dr. Anastasija Kostiučenko-Kessler a Měto Nowak pśiwobrośiju se aktuelnym pšašanjam, což nastupa situaciju dolnoserbskeje rěcy, rewitalizěrowanje a rěcne planowanje. Wóni budu informěrowaś wót slěźaŕskich projektow instituta a mjazy drugim powědaś wót witalnosći teje rěcy, wót rěcnych nastajenjow, wót widobnosći togo serbskego w zjawnem rumje a wót rewitalizaciskego projekta SROKA.
Mimo togo panela budu tśi wósebne pśednoski we ramiku rěcywědnych panelow a sekcijow wót Lydije Matikec, dr. Leńka Šołćic a prof. dr. Thomasa Menzela. Thomas Menzel buźo wót togo powědaś, kak móžomy namakaś rědke póžyconki (z drugich rěcow pśewzete słowa) we wobyma serbskima rěcoma, ako w słownikach dla rěcneje politiki cesto feluju. Lydija Matikec buźo pśedstajiś prědne rezultaty swójogo slěźenja ku górnoserbskej wobchadnej rěcy a pólskej rěcy we Nordrhein-Westfalskej, kótarež wóna wugbajo we ramiku zgromadnego DFG-projekta wót Serbskego instituta a Ruhr-uniwersity w Bochumje. Leńka Šołćic buźo we swójom pśednosku pśirownaś wěste gramatiske funkcije górnoserbskeje wobchadneje rěcy z drugimi słowjańskimi rěcami.
Dr. Anastasija Kostiučenko-Kessler, sociolinguistka we wótźělenju za regionalne wuwiśe a mjeńšynowy šćit, wuzwignjo: „Z tym, až Serbski institut se na 15. Dnju slawistiki wobźělijo a ten panel pśewjeźo, spěchujo dialog wót šansow a wupominanjow pśi rewitalizěrowanju dolnoserbskeje rěcy. Z tym stajijo se dolnoserbska rěc ako autochtonska (domorodna) pódwjacornosłowjańska mjeńšynowa rěc w Nimskej kradu do fokusa.“
Nimski źeń slawistiki jo organizěrowany wót Zwěska nimskeje slawistiki a pśewjeźo se kužde tśeśe abo stwórte lěto na drugej uniwersiśe ze slawistiskim institutom – program a dalšne informacije.