Wupisanje: wědomnostny:a sobuźěłaśeŕ:ka (ž/m/d) we wobłuku „rewitalizacija dolnoserbskeje rěcy“/„pśirownujuca rěcna politika“
Serbski institut pyta k nejblišemu terminoju za Chóśebuz wědomnostnego sobuźěłaśerja / wědomnostnu sobuźěłaśeŕku (ž/m/d) we wobłuku „rewitalizacija dolnoserbskeje rěcy“/„pśirownujuca rěcna politika“. Jadna se wó pó casu wobgranicowane połne městno. Reducěrowanje źěłowego casa jo na nanejmjenjej 30 góźinow/tyźeń pó dogronjenju móžne.
Městno jo wobgranicowane až do 31.12.2027. Myto se płaśi za tarifom TV-L (E13), su-li wósobinske kriteriumy dopołnjone.
Serbski institut jo zwenkauniwersitarna interdisciplinarna slěźaŕska institucija z jadnab 70 pśistajonymi na dwěma městnosćoma (w Budyšynje a Chóśebuzu). Wón slěźi na pólu rěcy, historije a kultury Serbow w Górnej a Dolnej Łužycy w zachadnosći a źinsajšnem casu. Institutoju pśisłušatej ako jogo integralnej źěła Serbski kulturny archiw a Serbska centralna biblioteka.
We wobłuku wótźělenja „Regionalne wuwiśe a mjeńšynowy šćit“ jo městno pśirědowane interdisciplinarnej źěłowej kupce k „rewitalizaciji a rěcnemu planowanju serbskeju rěcowu“. Wědomnostny zaměr kupki jo, ze slěźenim – we Łužycy a mjazynarodnje pśirownujucy – empiriski a teoretiski substancielnje pśinosowaś k mjazynarodnej wědomnostnej debaśe wó rěcnem planowanju a rewitalizaciji mjeńšynowych rěcow.
Nadawki
- wobźěłaś źěłowy wobłuk „Pśirownujuca rěcna politika“ (awtochtonych) mjeńšynow we wubranych krajach Europy
- pódpěraś pśedewześe wótźělenja „masterplan k rewitalizaciji dolnoserbskeje rěcy“ pśez rozestajanje z mjazynarodnym stawom slěźenja, pśez zběranje nejlěpšych praktikow, rozestajanje z móžnymi paslami wósebnje glědajucy na rěcne plany, institucionalizěrowanje rěcnego planowanja a na wobchadanje z njedostatkom wucabnicow a wucabnikow
- sobu statkowaś pśi pśewóźowanju imersiwnego projekta „Zorja“, kótaryž se spěchujo z pjenjezymi za strukturnu změnu, a pódpěrowaś jogo zaměry pśez swójske slěźenja na pólu kubłanja dorosćonych
- organizěrowaś a pśewjasć transferowe a dialogowe zarědowanja
- sobu statkowaś pśi napóranju regionalnych a mjazynarodnych seśow wótźělenja
- wobźěliś se na wědomnostnych zejźenjach w tu- a wukraju
- sobu statkowaś pśi powšyknych nadawkach/zarědowanjach wótźělenja a instituta
Pominanja
- wótzamknjony wusokošulski studium (master) w jadnom z pśiducych abo pśi-swójźbnych pśedmjatow: (pśirownujuce) politiske wědomnosći, pšawnistwo, sociolinguistika, sociologija, kubłańske wědomnosći ze śěžyšćami w didaktice a/abo rěcnem planowanju, etnologija abo socialne wědomnosći, empiriske kulturne wědomnosći, sorabistika, slawistika abo druge filologije
- znaśa w mjazynarodnje pśirownujucej politiskej analyzy
- wjelgin dobre znajobnosći nimskeje a engelskeje rěcy w słowje a pismje
- znaśa jadneje ze serbskeje rěcowu su lěpšyna, njejsu pak wuměnjenje za pśistajenje, wócakujo pak se zwólnosć, serbsku rěc nawuknuś resp. wótpowědne znajobnosći pódłymiś
- wěste wobchadanje z relewantneju software; znajobnosći software za socialnowědomnostnu datowu analyzu (na pś. kwalitatiwna analyza datow, online-napšašowanja, statistika) su k lěpšemu
- zwólnosć se dalej kubłaś
- samostatna wašnja źěła, komunikaciska kompetenca a zamóžnosć w teamje źěłaś
- zwólnosć za drogowanje
Póbitujomy Wam:
- inowatiwnu, kooperatiwnu a fleksibelnu źěłowu a slěźeńsku wokolinu
- móžnosć, mjazynarodnje pśirownujucy slěźiś
- až móžośo w dlěj trajucem pśedewześu swój wědomnostny profil rozwijaś
- až móžośo w zapśimujucych praktiskich pśedewześach z wusoko motiwěrowanymi a angažěrowanymi partnarjami gromaźe źěłaś
- až móžośo pśez wuknjenje/nałožowanje dolnoserbšćiny w projektowem teamje źěł rewitalizaciskego projekta za dolnoserbšćinu byś
Wjaselimy se na Wašo procowanje!
Serbski institut spěchujo rownostajenje žeńskich a muskich we pówołanju a angažěrujo se za to, aby se dało familijowe žywjenje z pówołanim zwězaś. Togodla nagranjamy wósebnje žeńske, aby se wó to źěłowe městno procowali. Glědamy na to, aby śěžko zbrašonym pśi jadnakej gódnosći k źěłu dali prědnosć.
Pšosbu wó pśistajenje pósćelśo nanejpózdźej do 15.05.2024 gromaźe z pśisłušnymi pódłožkami jano w digitalnej formje (pśez e-mail w pdf-formaśe) na direktorat Serbskego instituta na adresu si@serbski-institut.de. Teke pózdźej pśichadajuce procowanja mógu se zapśimowaś, jolic jo městno hyšći wótwórjone.
Pokaz na šćit datow: Zrownju z pśipósłanim pšosby wó źěło pśiwdajośo nam pšawo, aby Waše wósobinske daty w ramiku pśistajeńskeje procedury pśeźěłali. Toś to zwólenje móžośo kuždy cas a mimo pomjenjenja pśicynow napśeśiwo direktoratoju pisnje abo elektroniski slědk weześ. Wobmysliśo pak, až slědkweześe togo zwólenja buźo k tomu wjasć, až njebuźomy móc na Wašo procowanje w běgu aktualneje procedury wěcej glědaś.
Wótźělenje za regionalne wuwiśe a mjeńšynowy šćit jo pśedewześe, kótarež se na Serbskem instituśe spěchujo z pjenjezami Zwězka we ramiku spěchowańskego programa „Serbska rěc a kultura we casu strukturnego pśeměnjenja” wót kraja Bramborska.